MANATUTU, 02 Agostu 2025 (TATOLI)—Abitante sira husi postu-administrativu Natarbora, munisípiu Manatutu, haksolok tebes ho polítika Governu Konstitusional da-sia nian hodi halo lansamentu fatuk dahuluk ba reabilitasaun ponte Lamara iha suku Umaboku, postu administrativu Natarbora, munisípiu Manatutu.
Ponte Lamara antes ne’e konstrui iha tinan 2003 maibé aat tiha iha tinan 2019 tanba afeta husi bee-mota mak sobu, nune’e difikulta komunidade husi Natarbora no Fatuberliu-Manufahi hodi halo movimentu ba-mai bainhira iha tempu udan.
Reprezentante Komunidade Natarbora, Sebastião da Costa, sente kontente tebes tanba durante tinan naruk nia laran, dalaruma sira halo movimentu liuhusi mota laran de’it, nune’e akontese mota tun lori komunidade ida bainhira nia atu hakur mota ba mota sorin.
“Iha mandatu Governu da-sia nian lori fali novidade di’ak hodi hadi’a ponte ne’e no ami sente haksolok tebes,” abitante ne’e espresa nia sentimentu hodi hateten ba jornalista sira iha Natarbora-Manatutu, Umaboku, ohin.
Prezidente Autoridade Munisípiu Manatutu, Luís Fernandes, sente kontente ho reabilitasaun ba ponte ne’e tanba benefisiáriu husi ponte ne’e la’ós de’it ba Manatutu-Natarbora maibé iha postu tolu hanesan Natarbora, Fatuberliu (Manufahi) no Lakluta (Vikeke).
“Komunidade mak utiliza ponte ne’e tanba halo viajen ba Dili besik liu. Ponte ne’e uluk ema Indonézia halo to’o rohan de’it, maibé iha 2005 kontinua konstrusaun husi Governu dahuluk hodi hatutan to’o rohan hodi utiliza,” nia relata.
Ministru Obra Públika, Samuel Marçal, reforsa, ohin, Governu asina kontratu ho kompañia, pelumenus fulan ida-ne’e nia laran sira bele halo mobilizasaun ekipamentus para bele hahú ona konstrusaun.
“Ita fó durasaun tempu ba sira durante tinan ida. Aproveita mós agora atu tama ba bailoron no mota hahú maran, entaun ita aproveita oportunidade ida-ne’e. Ha’u dehan onacba kompañia sira katak ita iha tinan ida tempu bailoron uitoan de’it mak fulan haat ka lima, nune’e husu sira aselera servisu ho lalais,” nia hateten.
Governtante ne’e afirma, hein katak,iha tempu bailoron ne’e aloserse sira iha okos ne’e bele ramata ona, tanba ponte ida-ne’e hanesan dalan diresaun entre Natarbora ba Fatuberliu no Vikeke, entaun fasilita tebes komunidade hodi halo movimentu ba-mai liuhusi dalan ne’e.
“Ponte ida-ne’e hahú konstrui iha tinan 2003, mandatu Governu dahuluk nian, ha’u hanoin tempu ne’ebá ladun iha analiza didi’ak no estudu didi’ak, tanba ne’e mak ponte ne’e la dura,” nia dehan.
Iha biban ne’e, Diretór Kompañia Shandong Heijan, Renung Jie, garante sei implementa servisu ho kompletamente tuir kontratu ne’ebé mak iha, nune’e sira sei halo reabilitasaun ponte ne’e ho kualidade no fó satisfasaun ba nasaun sosiedade no Governu.
“Ami prepara tékniku enjinária husi nasaun Xina nian no mós timoroan balun no traballadór husi nasaun Xina inklui mós lokál rasik. Ami iha ekipamentu ne’ebé mak kompletu hodi apoiu servisu ita terenu,” nia hateten.
Reabilitasaun ponte Lamara ne’ebé lokaliza iha Manatutu-Natarbora ne’e kaer husi kompañia Shandong Heijan Construction Group China, ho durasaun tempu tinan ida, medida naruk metro 100 liu, medida luan kuazé metro neen (6) liu no totál orsamentu hamutuk $4,605,887.72.
Jornalista : Alexandra da Costa
Editór : Cancio Ximenes
