Governu sei esforsu realiza komunidade nia preokupasaun kona-ba normalizasaun estrada
MANATUTU, 02 Agostu 2025 (TATOLI)—Ministru Obra Públika, Samuel Marçal, hateten Governu Konstitusionál da-sia (IX) sei rona no esforsu hodi realiza komunidade nia preokupasaun kona-ba infraestrutura bázika hanesan estrada liuliu normalizasaun estrada iha área rurál.
“Prosesu estrada iha Natabora ne’ebé liga ba Fatuberliu no Lakluta besik finaliza ona, hein katak, tempu badak ita mós sei lansa fatuk dahuluk husi área ne’e ba to’o Fatuberliu,” Ministru Obra Públika (MOP), Samuel Marçal, informa ba jornalista sira hafoin ramata serimómia lansamentu fatuk dahuluk ba ponte Lamara iha Natarbora, Manatutu, Umaboku, ohin.
Abitante husi postu-administrativu Natarbora, suku Umaboku, munisípiu Manatutu, Sebastião da Costa, husu Governu atu kontinua halo reabilitasaun estrada sira-ne’ebé lokaliza husi postu ba suku sira, tanba durante ne’e kondisaun Estrada ne’ebé grave difikulta sira halo movimentu ba-mai.
Nia dehan, estrada sira hahú husi Manatutu villa to’o iha postu Natarbora vila ne’e, kuazé di’ak tanba nahe ona alkatraun maibé to’o de’it iha postu polísia nian, enkuantu estrada liga ba suku no aldeia sira kontinua grave nafatin.
“Ami-nia preokupasaun ne’e mak ponte no Estrada, tanba buat hotu-hotu ita tenke la’o husi estrada no hakat husi ponte,” Abitante ne’e informa ba jornalista sira iha suku Umaboku, Manatutu, ohin.
Aleinde ne’e, nia dehan, Governu sei halo projetu boot iha Natrabora, hanesan hateten beibeik katak Governu sei dada kadoras liuhusi dalan ne’e, entaun tenke normaliza uluk dalan halo di’ak nune’e labele fó impaktu ba ema hotu halo movimentu bainhira vizita tasi-feto no tasi-mane.
Prezidente Autoridade Munisipál Manatutu, Luís Fernandes, hateten estada ligasaun husi Dili to’o iha ne’e balun kondisaun di’ak, maibé atu ba fali iha suku no aldeia sira mak sei kondisaun aat hela, entaun ne’e sai hanesan preokupasaun sosiedade nian.
“Ha’u fiar katak ho prezensa Ministru Obra Públika nian bele halo normalizasaun estrada ne’e ho di’ak, tanba kadoras sei dada husi ne’e, normalmente tenke kria kondisaun di’ak ba dalan ne’e para ema bele ba-mai ho di’ak,” nia dehan.
Jornalista : Alexandra da Costa
Editór : Cancio Ximenes
