DILI, 02 Agostu 2025 (TATOLI)—Jurista Sergio Quintas husu Prezidente Republika, José Ramos-Horta, atu kumpre desizaun Tribunál Rekursu ne’ebé deklara ona inkonstituisionáldade ba lei organizasaun judisiáriu.
Sergio esplika, Prezidente Repúblika tenke altera fali nia desizaun ne’ebé nomeia Prezidente Tribunál Rekursu, Afonso Carmona, hodi nomeia fali Prezidente Tribunál Rekursu foun, se lae kuandu Prezidente la kumpre desizaun Tribunál Rekursu mak ba oin ninia efeitu juridiku ne’e iha mak sei halai ba desizaun sira-ne’ebé Prezidente Tribunál Rekursu foti tanba laiha efeitu jurídiku no hetan responsabilidade Kriminál.
“Tuir ha’u-nia pontu-de-vista jurídika desizaun Tribunál Rekursu nian ne’e iha efeitu jurídiku katak se Presidente Tribunál Rekursu ne’e halo kna’ar nafatin mak nia kompenténsia ne’e sei la hamosu efeitu jurídiku ruma no momentu ida, nia bele hetan responsabilidade kriminál,” Sergio Quintas hateten ba AgênciaTatoli liuhusi WhatsApp, sábadu ne’e.
Nia esplika, desizaun Tribunál Rekursu nian né’ebe deklara inkonstituionál ba artigu 76 alinea 2 husi lei organizasaun judisiária, desizaun referida hatudu ba ita hotu katak antes na’in-ulun sira atu foti desizaun ruma tenke bazeia ba lei no norma konstitusionál.
“Se na’in-ulun sira mak foti desizaun ruma lahó fundamentu ruma ne’e sei hamosu konfuzaun,”nia dehan.
Nia hatutuan, desizaun Tribunál Rekursu nian ne’e kestaun ida sériu, tanba se desizaun ida-ne’e mak na’in-ulun sira la kumpre mak sai presedente ida ladi’ak iha futuru, tanba desakreditasaun no minimizasaun ba podér judisilária mai husi podér polítiku.
“Ita espera katak desizaun referida la’ós sai buat todan ida ba órgaun soberania sira seluk, maibé desizaun ida para bele hakruuk no respeitu. Só meiu sira hanesan ne’e bele fortifika Estadu-de direitu iha Timor Leste. Se lae, justisa ne’e konsidera ba ema kiik de’it maibé ba ukun-na’in la eziste,” nia dehan.
Quintas hateten, desizaun Tribunál Rekursu ne’e juridikamente kestaun ida seriu, entaun Estadu tenke rezolve norma konstitusionál, se lae mak sai prszedente ida ladi’ak iha futuru.
Jornalista : Natalino Costa
Editór : Cancio Ximenes
