PDHJ husu Prezidente Repúblika kumpre desizaun Tribunál Rekursu

DILI, 02 Agostu 2025 (TATOLI)—Provedór Direitu Humanu no Justisa, Virgilio da silva Guterres, deklara desizaun Tribunál nian aas liu, tanba ne’e Prezidente Repúblika no sidadaun hotu-hotu tenke kumpre ba desizaun Tribunál ninian.
“Kona-ba lei Judisiariu ha’u seidauk simu notifikasaun husi Tribunál Rekursu hodi fó komentariu klaru kona-ba ida-ne’e. Maibé, buat ne’e ha’u atu enkoraja públiku no Estadu mak desizaun Tribunál nian desizaun ida-ne’ebé aas liu. Desizaun Tribunál nian atu tuir ita-nia hakarak ka la tuir ita-nia hakarak, ita hotu tenke hakruuk ba desizaun Tribunal nian,” Virgilio Guterres hateten ba Agência Tatoli iha Kaikoli, sesta ne’e.
Nia hatutan, tribunál nia desizaun ne’e aas liu tanba Tribunál nia desizaun sai hanesan jurusprudensia atu halo desizaun ba buat seluk.
Tuir nia, se desizaun Tribunál Rekursu mak dehan lei organizasaun judisiáriu kona-ba nomeasaun Prezidente Tribunál Rekursu iha inkonstitusionál ne’e iha implikasaun.
“Sé desizaun ne’e kona-ba Prezidente Tribunál Rekursu nian, iha serteza katak iha implikasaun. Implikasaun ne’e bele di’ak no bele la’diak, tanba se prosesu ne’ebé la’o dehan inkonstitusionál sei iha implilasaun,” nia hateten.
Vírgilio hateten, iha demokrasia desizaun Tribunál nian aas liu maibé se ema lahalo tuir ne’e signifika la fó edukasaun sívika ida-ne’ebé ba povu no públiku kona-ba demokrasia.
Jornalista : Natalino Costa
Editór : Cancio Ximenes

