MANATUTU, 02 Agostu 2025 (TATOLI)—Primeiru-Ministru (PM), Kay Rala Xanana Gusmão, sábadu ne’e, akompañadu hosi Ministru Obra Públika, Samuel Marçal no Prezidente Bee Timor-Leste BTL, E.P, Gustavo da Cruz, hala’o observasaun ba estasaun bomba bee-moos iha postu administrativu Fatuberliu, munisípiu Manufahi.
Objetivu husi observasaun ne’e rasik Primeiru-Ministru Xanana hakarak haree diretamente rezultadu husi estasaun bomba bee-moos ne’e, tanba hetan ona inaugurasaun iha loron 26 Jullu 2025 husi Ministru Obra Públika, Samuel Marçal, ne’ebé fó duni benefísiu ba povu.
Sistema ida-ne’e fornese bee moos bá uma ka’in 759 iha postu administrativu Fatuberliu ho populasaun benefisiáriu hamutuk 4.554.
Ministru Obra Públika, Samuel Marçal, hateten atividade ohin halo inaugurasaun ba fornesimentu bee-moos inklui observa direta komunidade nia problema kona-ba nesesidade bázika, tanba ne’e husu ba komunidade atu kuidadu ho fasilisade ne’e.
“Primeiru-Ministru orienta ona mai ha’u atu tau prioridade liu ba ita-nia komunidade ne’ebé iha área rurál no iha suku, aldeia tantu postu sira,” Ministru ne’e informa ba jornalista sira iha edifísiu administrasaun postu administrativu Fatuberliu, ohin.
Governante ne’e haktuir, MOP halo serbisu barak-liu iha área rurál liuliu iha eletrisidade, estrada no bee-moos, durante tinan-rua nia-laran.
“Serbisu tolu ne’e relasaun metin liu ho ita-nia povu nia nesesidade no preokupasaun loro-loron, nune’e ita sempre la’o halo fiskalizasaun barak liu ba aldeia sira hodi rona povu nia preokupasaun,” nia dehan.
Projetu ne’e ho totál orsamentu hamutuk millaun $1,5 ne’ebé implementa hosi kompaña nasionál tolu mak hanesan, Haksolok, Zafar no Arlong ne’ebé halo serbisu ho kualidade.
Lembra katak, iha loron 26 Jullu 2025 Ministériu Obra Públika (MOP) no Bee Timor-Leste, Empreza Públika (BTL, E.P) inaugura kanalizasaun fornesimentu bee-moos iha postu administrativu Fatuberliu, munisípiu Manufahi.
Jornalista : Arminda Fonseca
Editór : Cancio Ximenes
