MANATUTU, 02 Agostu 2025 (TATOLI)—Primeiru Ministru, Kay Rala Xanana Gusmão, apela ba autoridade lokál sira iha munisípiu Manatutu liuliu autoridade Natarbora, atu kontinua promove juventude sira hodi partisipa mós iha dezenvolvimentu nasionál.
Xefe Governu ne’e hatutan, nia parte lakohi haree joven Natarbora-oan sira ba hotu Dili, maibé juventude sira tenke servisu iha imi-nia rain rasik.
“Ohin loron, inan-aman terus tebe-tebes haruka ba eskola maibé sira halimar mak laptop, telefone, whatsapp, facebook sira no haruka servisu lahatene. Ita haruka fali ema seluk mak okupa kampu traballu, ita la partisipa iha ita-nia dezenvolvimentu nasionál,” Primeiru-Ministru ne’e hateten ba komunidade Natarbora liuhusi diskursu iha fatin serimónia lansamentu fatuk dahuluk ba konstrusaun ponte Lamara Natarbora, iha Umaboku, ohin.
Tanba ne’e, Xanana apela ba xefe suku no katuas sira atu ko’alia ho foinsa’e sira atu buka aprende servisu, tanba Natarbora sei sai ponte boot ida ba reseita ekonómia ho valór internasionál liuhusi kadoras, ne’e duni joven tenke partisipa iha formasaun oioin.
“Bainhira ema husi nasaun seluk mak mai okupa servisu, imi haree de’it, entaun foinsa’e sira imi la serve liu ba ukun-aan ninian. Tanba, katuas sira iha ne’e barak mak lahatene lee no hakerek, maibé hanoin kona-ba ukun-an, ita mak kaer distinu rai metin iha sira-nia fuan,” nia dehan.
Administradór Postu Administrativu Natarbora, José Ramos, hateten mensajen husi Primeiru-Ministru ne’e atu fanun juventude sira hodi akompana no envolve direta ba iha dezenvolvimentu nasionál hodi la’ós maka’as iha Timor laran tomak liuliu iha parte Natarbora.
“Ida-ne’e tanba maiória komunidade iha Natarbora juventude barak, no balun sei dukur hela ba ukun-aan. Tanba ne’e, ami iha ona kompeténsia hodi hafanun sira badinas atu envolve ba iha projetu sira-ne’ebé Governu da-sia (IX) implementa,” nia hateten.
Jornalista : Alexandra da Costa
Editór : Cancio Ximenes
