MANATUTU, 03 Agostu 2025 (TATOLI)—Komunidade iha postu-administrativu Natarbora, suku Umaboku, munisípiu Manatutu, husu Governu liuhusi Ministériu Agrikultura, Pekuária, Peska no Floresta atu reabilita sistema irrigasaun hodi hasa’e produsaun hare.
Abitante iha suku Umaboku, Sebastião da Costa, hateten problema sosiál ne’ebé baibain sira hasoru, aleinde infranstrutura bázika maibé sira mós preokupa ho irrigasaun ne’ebé ladun di’ak hodi difikulta sira-nia produsaun hare.
“Ami iha ne’e moris hanesan agrikultór mak barak, la’ós iha to’os de’it maibé ami mós kuda hare. Dalabarak kultivasaun hare ladun di’ak tanba irrigasaun, entaun ami labele halo buat ida. Ami kuda hodi han de’it, atu lori ba faan iha merkadu tauk tanba kultivasaun ladun di’ak,” komunidade ne’e informa ba jornalista sira iha Umaboku, Natarbora, sabadu (02 Agostu 2025) ne’e.
Abitante ne’e dehan, servisu ida-ne’e mak baibain sira halo hodi sustenta família no fó oan sira ba eskola no kada tinan sira hakarak hasa’e produsaun hare, maibé ho kondisaun irrigasaun ne’ebé ladun di’ak, entaun la ajuda sira-nia produtu. Maske, sira hato’o ona ba autoridade lokál sira kona-ba preokupasaun sira-ne’e maibé seidauk iha resposta.
“Ami hein de’it, aproveita oportunidade ne’e ami bele hato’o ami-nia preokupasaun tomak liuhusi mídia,” nia hateten.
Xefe suku Umaboku, Felicino da Costa, afirma hanesan autoridade lokál esforsu hodi tatoli preokupasaun husi komunidade nian hanesan irigasaun ba ona parte kompetente sira, maske balun Governu halo ona rebilitasaun ba irrigasaun maibé balun seidauk.
“Tanba ita-boot sira haree Manatutu iha natar ne’ebé boot no ida-ne’e mak sai benefísiu ba komunidade nian moris loro-loron. Nune’e, proposta ami hatama beibeik ona, tanba ne’e ami husu Governu atu aselera,” nia dehan.
Líder komunitária ne’e esplika, enkuantu se ko’alia atu hasa’e produsaun agrikola, hakarak ka lakohi Governu liuhusi Ministériu Agrikultura tenke hadi’a irrigasaun sira no se nafatin garante ba irrigasaun tradisionál, entaun labele mehi atu hasa’e produsaun agrikultura.
Jornalista : Alexandra da Costa
Editór : Cancio Ximenes
