ADN rejista projetu foun infraestrutura bázika 400-resin iha 2025
DILI, 04 Agostu 2025 (TATOLI)-Ajénsia Dezenvolvimentu Nasionál (ADN) rejista no halo verifikasaun projetu foun ba infraestrutura bázika iha tinan ne’e hamutuk 400-resin no barak liu mak projetu konstrusaun estrada rurál.
Diretór Interinu Ajénsia Dezenvolvimentu Nasionál, Januário Maia Guterres, hateten ADN iha dadus hatudu katak projetu sira-ne’ebé la’o hela ne’e hamutuk 900-resin ne’ebé ninia kustu kontratu ho kuantidade boot hahú husi rihun $100 ba leten, no seluk tan mak projetu foun ba tinan ida-ne’e nian mak ADN verifika ona hamutuk projetu 400-resin.
“Projetu sira-ne’e barak liu husi Ministériu Obra Públika ne’ebé liga liu ba estrada iha área rurál, entaun kuazé projetu 300-resin mak sira verifika ona no 100-resin mak iha hela faze aprovizionamentu,” Diretór Interinu ne’e informa ba Agência Tatoli iha nia kna’ar fatin, Fatuhada, ohin.
Nia hatutan, tanba tuir orientasaun husi Primeiru-Ministru ba Ministériu Obra Públika (MOP) no Ministériu Planeamentu Investimentu Estratéjiku (MPIE) katak, projetu infraestrutura bázika tenke tau prioridade liu ba iha área rurál sira.
“Ha’u hanoin projetu haat ne’ebé foin lalais iha reuniaun Konsellu Ministru aprova ne’e verifikadu husi ADN, no ninia dezeñu BoQ verifika hotu ona,” nia dehan.
Nune’e, iha faze tuir mai mak Konselluo Administrasaun Fundu Infraestrutura (KAFI) aprova submete ba Konsellu Ministru delibera hodi halo prosesu aprovizionamentu ramata entaun ADN kontinua halo monitoriza.
Jornalista : Alexandra da Costa
Editór : Cancio Ximenes
