DILI, 04 Agostu 2025 (TATOLI) –Konfederasaun Desportiva Timor-Leste (CDTL-sigla portugeza) kontinua halo koordenasaun ho Governu liuhusi Ministériu Juventude, Desportu, Arte no Kultura (MJDAK) atu fó-atensaun ba atleta timoroan ne’ebé partisipa iha Jogu Desportivu Komunidade Nasaun Sira Lian Portugés (CPLP-sigla portugeza).
Sekretária Ezekutiva CDTL, Bernardina da C. Guterres ‘Titi’ hato’o sentimentu apresiasaun tanba foin dahuluk Timor-Leste sai nu’udár uma-na’in ba kompetisaun entre nasaun membru CPLP, mezmu preparasaun atleta mínimu maibé bele gaña rezultadu ne’ebé sai orgullu ba timoroan hotu.
“Ami nafatin koordena ho MJDAK atu oinsá tau-atensaun nafatin ba ita-nia atleta sira tanba maioria idade sei ki’ik,” Sekretária Ezekutivu CDTL informa ba TATOLI iha ninia kna’ar fatin, Jináziu Dili, Segunda ne’e.
Titi rekoñese atleta hirak-ne’e iha talentu ne’ebé di’ak no hatudu prestasaun tanba kontinua asegura nune’e futuru bele partisipa iha eventu kompetisaun Internasionál seluk hanesan Asean Games no Olímpiku.
Aleinde ne’e, CDTL kontinua fó pareser ba federasaun desportiva sira liuhosi atividade monitorizasaun liuliu papél kada federasaun sira-nian ligadu ho atividade hotu relasiona ho preparasaun atleta iha kada modalidade.
“Ba futuru ita garantia atleta sira-ne’e, maibé filafali ba sira kuandu kontinua treinu tuir oráriu, disiplina maibé federasaun no CDTL hamutuk ho Governu mós tenke kolabora másima,” Titi salienta.
CDTL nu’udár organizasaun ne’ebé mahon ba federasaun desportiva hamutuk 31 ne’ebé eziste iha Timor-Leste.
Entretantu, totál atleta ne’ebé partisipa iha Jogu Desportivu CPLP ba dala-XII 2025 husi Timor-Leste hamutuk na’in-52, kompostu husi Taekwondo, Futeból, Atletizmu, Basketból, Voliból, Xadres, Karate-do, Tenis Rai no Para-atletizmu.
Jornalista: Natalino Belo
Editór: Xisto Freitas da Piedade
