CSSI Kovalima rejista kandidatu benefisiáriu foun 718 ba programa bolsa da mãe
KOVALIMA, 04 Agostu 2025 (TATOLI)- Sentru Solidariedade Sosiál no Inkluzaun (CSSI) munisípiu Kovalima, daudaun ne’e, rejista ona kandidatu benefisiáriu foun atu asesu ba programa bolsa da mãe kondisionál hamutuk 718 iha munisípiu Kovalima.
“Ita hala’o rejistu bazeia ba despaixu husi Diretór Jerál Ministériu Solidariedade Sosiál no Inkluzaun iha Kovalima ita hahú rejistu kandidatu benefisiáriu foun ba bolsa da Mãe kondisionál 718 tuir kritéria ne’ebé mak iha”, Xefe Unidade Asisténsia Inkluzaun Sosiál, Nelson de Jesus, informa dadus ne’e ba TATOLI, iha nia servisu fatin, ohin.
Tékniku sira hala’o rejistu ba faluk no oan ki’ak ne’ebé tuir nia rekezitu benefisiáriu sira atu rejistu presiza dokumentu sira hanesan, inan no aman nia kartaun eleitorál no Billete Identidade ba oan sira presiza sertidaun baptismu, kuandu laiha lori de’it RDTL, deklarasaun eskola no fixa família.
“Ami finaliza ona halo rejistu no daudaun ne’e ami ensera hodi elabora dadus iha sistema, nune’e hein prosesu kandidatu benefisiáriu ne’ebé mak elizivel no la elizivel hodi hein desizaun atu halo pagamentu iha fulan Setembru ka Outubru tinan ne’e”, nia dehan.
Governu da-sia halo mudansa proseu pagamentu ba benefisiáriu bolsa da mãe kondisionál iha tinan kotuk ho montante kada-fulan hetan $5, maibé daudaun ne’e pagamentu haree ba alunu sira-nia nivél edukasaun hanesan alunu ne’ebé eskola primária kada fulan ema ida iha direitu ba $8.00, EBC $9.00 no alunu ba ensinu sekundáriu kada fulan $10.00 .
Prosesu pagamentu ba programa benefisiáriu bolsa mãe kondisionál tinan-ida hala’o dala-ida ne’ebé pagamentu hala’o kada fulan neen, molok ne’e loron fiksu pagamentu iha fulan-Maiu, daudaun ne’e depende ba situasaun no sistema.
Tuir planu Ministériu Solidariedade Sosiál no Inkluzaun (MSSI), sei hala’o pagamentu ba benefisiáriu bolsa da Mãe kondisionál, iha Setembru la’e sei hala’o iha Outubru 2025 ne’e.
Jornalista :Celestina Teles
Editór :Florencio Miranda Ximenes
