DILI, 04 Agostu 2025 (TATOLI)—Ministru Transporte no Komunikasaun, Miguel Marques Gonçalves Manetelu nomeia Antigu Ministru Infraestrutura, Pedro Lay da Silva (IV Governu Konstitusionál) sai Koordenadór ba instalasaun kabu submarinu fibra ótika, ho mandatu tinan-ida.
“Ha’u halo ona nomeasaun ba komisaun instaladora la’ós definitivu no ha’u haree ba ema-nia envolvimentu prosesu hahú kedas husi tinan 2014, nia envolve ona iha laran no iha koñesimentu tékniku, aleinde ne’e nia mós eis membru Governu iha setór telekomunikasaun duni,” Ministru informa ba Ajénsia TATOLI hafoin partisipa iha reuniaun Konsellu Ministru, iha Palásiu Governu, Segunda ne’e.
Governante ne’e dehan, bainhira prosesu hakat ba definitiva ona maka Koordenadór ne’e sei retira.
Antes ne’e iha loron 31 Jullu 2025, Ministru Miguel Marques hamutuk ho Vise Primeiru-Ministru, Ministru Koordenadór Asuntu Ekonómiku, Ministru Turizmu no Ambiente Francisco Kalbuady Lay inklui Ministru Planeamentu no Investimentu Estratéjiku Gastão de Sousa halo reuniaun hodi koa’lia kona-ba nomeasaun ba Koordenadór Komisaun instaladora nian.
Notísia relevante : Kriasaun CTL, E.P sei jere kabu submarinu fibra ótika
Durante enkontru, governante sira delibera kona-ba asuntu ajenda prinsipál balun inklui nomeasaun Koordenadór Komisaun Instaladora nian, tuir lejizlasaun nasionál aplikável, Dekretu-Lei 17/2025 loron 25 Juñu – Kriasaun “Cabos de Timor-Leste, E. P.” no aprova ninia estatutu sira, no diskusaun kona-ba preparasaun operasionál ba lansamentu CTL, E.P. asuntu krítiku sira hanesan identifikasaun instalasaun inisiál sira, preparasaun planu asaun fulan 12 nian, no reforsa protokolu seguransa ba infraestrutura esensiál sira.
Komisaun Instaladora atu finaliza rekomendasaun sira kona-ba oráriu operasionál no orsamentu preliminár.
Enkuantu, Konsellu Jerál CTL, E.P afirma ninia kompromisu ba transparénsia no koordenasaun ne’ebé besik ho parte interesada sira inklui Ministeriu Defeza atu asegura roll out ida-ne’ebé la loos no efetivu. Dezenvolvimentu sira seluk sei komunika hafoin sorumutu Konsellu tuir mai.
Jornalista : Alexandra da Costa
Editora : Julia Chatarina
