VIKEKE, 04 Agostu 2025 (TATOLI)—Komandante Jerál Polísia Nasionál Timor-Leste (PNTL), Henrique da Costa ho ekipa iha Segunda ne’e disemina servisu seguransa ba autoridade lokál no komunidade iha Postu Administrativu Uatulari, Munisípiu Vikeke.
Iha diseminasaun ne’e, Komandante Jerál PNTL haktuir katak situasaun seguransa iha postu referida iha mudansa kompara ho tinan kotuk.
“Ita halo komparasaun ho tinan 2024, Postu Uatulari rejista kazu krime hamutuk 50, maibé iha trimestre dahuluk tinan 2025 situasaun iha mudansa. Agora daudaun kazu krime ne’ebé rejistadu hamutuk 20 de’it. Númeru kazu ne’e tun la’ós PNTL mesak mak servisu, maibé ida-ne’e autoridade no komunidade nia kooperasaun. Se ita hakarak dezenvolvimentu ita tenke kria pás no estabilidade iha ita-nia Postu Administrativu Uatulari,” Henrique hateten iha ámbitu abertura diseminasaun informasaun iha Sede Suku Makadike de Cima, Uatulari.
Tuir Komandante Jerál PNTL katak juventude agora daudaun komesa iha hanoin hodi hadook aan husi krime sira, tanba ne’e PNTL apresia autoridade lokál ne’ebé halo servisu maka’as hodi transforma joven sira-nia mentalidade.
Atu redús liután kazu sira-ne’e, nia husu PNTL Eskuadra Uatulari no autoridade lokál sira kontinua halo sosializasaun ba komunidade nune’e bele kombate krime sira.
Iha fatin hanesan, Administradór Postu Uatulari, Jorge Ribeiro hato’o agradesimentu ba Komandante Jerál PNTL ne’ebé disemina informasaun kona-ba seguransa nian ba autoridade no komunidade iha Postu Administrativu Uatulari tanba liuhusi diseminasaun ne’e sei redús krime sira iha postu ne’e.
Partisipa iha diseminasaun ne’e kompostu husi Komandante PNTL Munisípiu Vikeke, Komandante Polísia Eskuadra lima, membru PNTL, autoridade lokál, komunidade no joven Postu Uatulari.
Jornalista: Vitorino Lopez da Costa
Editór: Xisto Freitas da Piedade
