KOVALIMA, 05 Agostu 2025 (TATOLI)- Prezidente Autoridade Protesaun Sivíl, Jesuíno Matos dos Reis Carvalho, tersa-ne’e, ofisiálmente entrega foos saka 500 ba Prezidente Autoridade Munisípiu Kovalima.
APC entrega foos bazeia ba despaixu husi Ministru Interiór ho númeru referénsia 190/GPAPC- MIVI/2025.
Prezidente Autoridade Protesaun Sívil Timor-Leste entrega foos saka 500 ba Prezidente Autoridade Munisípiu Kovalima bazeia ba pedidu husi Autoridade hodi fó apoia ba ema kbi’it la’ek sira.
“Ami nia stock foos iha armajen Autoridade protesaun Sivíl sufisente hodi bele responde ba dezastre naturál ho aseitasaun husi Ministériu Interiór, ami bele distribui ba autoridade atu halo jestaun”, Prezidente Autoridade Protesaun Sivíl dehan molok entrega foos ba Autoridade Kovalima iha resintu AMC, Ohin.
Iha biban hanesan, Prezidente Autoridade Munisípiu Kovalima, Miguel Armada Cardoso, hato’o agradese ba Autoridade Protesaun Sivíl tanba bele responde pedidu hodi apoia liuliu entrega foos.
“Bazeia ba ami nia pedidu atu tulun ami nia komunidade vulneravel sira, Ema ho defisiénsia, Asrama Madre sira no labarik sira ne’ebé hetan violénsia oi-oin. Ami fi’ar ami nia tékniku sira sei halo jestaun ne’ebé di’ak hodi distribui foos ba komunidade ne’ebé mak presiza apoia”, nia afirma.
Autoridade Kovalima mós sujere ba tékniku sira atu identifika didiak dadus sira labele haree ba grupu partidária, maibé fó ba Kovalima-oan ne’ebé presiza duni.
Notisia relevante:APC Kovalima-Floresta koopera halo reflorestasaun hodi prevene dezastre naturál
Jornalista : Celestina Teles
Editór: Florencio Miranda Ximenes
