Autoridade Afaloikai husu Komjer PNTL orienta membru sira apreende kilat-manu
VIKEKE, 05 Agostu 2025 (TATOLI)—Xefe Suku Afaloikai, Postu Administrativu Uatulari, Munisípiu Vikeke, Cesario N. Pires husu Komandante Jerál Polísia Nasionál Timor-Leste (PNTL) orienta membru PNTL sira kontrola kilat-manu sira-ne’ebé sírkula iha Postu Uatulari.
“Dalabarak ita ko’alia proteje ita-nia animál fuik sira, maibé iha Postu Uatulari kilat-manu sírkula barak. Dalaruma ema lori liuhusi membru PNTL sira-nia oin, membru sira la halo apreensaun ba sasán ne’e,” Cesario ba TATOLI iha Suku Makadike de Cima, Postu Uatulari, Tersa ne’e.
Autoridade ne’e subliña animál fuik sira agora daudaun menus ba beibeik tanba ema uza kilat-manu kontinua kasa, tanba ne’e PNTL presiza kontrola kilat-manu sira-ne’e nune’e ema labele oho animál protejidu sira.
“Ha’u lahatene kilat manu ne’e maihusi ne’ebé. Ha’u suspeita membru PNTL mak hatama mai ka oinsá no kilat-manu nia munsisaun mós la prodús iha Timor. Tan ne’e, ha’u husu ba Komandante Jerál PNTL atu tau-matan ba asuntu ne’e,” nia hato’o.
Hatán ba kestaun ne’e, Komandante Jerál Polísia Nasionál Timor-Leste (PNTL), Henrique da Costa hateten PNTL sempre apreende ba kilat-manu, maibé balun kontinua lori subar, ne’ebé nafatin husu ba komunidade ne’ebé uza kilat-manu entrega ba PNTL.
“Kona-ba kilat-manu ita sempre halo kontrolu iha fronteira, maibé área fronteira ne’e luan, tanba ne’e kilat-manu sei kontinua tama mai TimOr. Tan ne’e, ha’u husu ba komunidade ne’ebé uza kilat-manu di’akliu entrega ba Komandu PNTL atu asegura,” nia fó-hanoin.
Jornalista: Vitorino Lopez da Costa
Editór: Xisto Freitas da Piedade
