KRO OJE 2026 foka liu ba programa Governu
DILI, 05 Agostu 2025 (TATOLI)–Ministra Finansa, Santina Cardoso, informa, reuniaun Komité Revizaun Orsamentu (KRO) ba Orsamentu Jerál Estadu (OJE) 2026 sei foka ba programa Governu hodi implementa Planu Asaun Anuál husi ministériu ida-idak.
“Tinan kotuk ita halo diskusaun ba KRO ne’e foka liu ba orsamentu ne’ebé aloka, ezekusaun hira no haree ba pedidu adisionál, maibé tinan ida-ne’e ita muda tuir instrumentu Primeiru-Ministru, Kay Rala Xanana Gusmão iha Ministériu Finansa, atu foka ba programa Governu nian, implementa ba Planu Asaun Anuál Ministériu sira, saida de’it maka iha atu implementa programa ne’e presiza rekursu saida no orsamentu saida, atu nune’e programa ne’e bele implementa,” Ministra Santina Cardoso hato’o ba jornalista sira iha Auditóriu Ministériu Finansa, Aitarak-laran, ohin.
Governante ne’e dehan, kada tinan bainhira atu prepara orsamentu sei iha KRO, tanba ne’e ohin iha ámbitu ne’e hahú bolu liña ministériu ida-idak atu avalia proposta planeamentu no orsamentu husi ministériu ida-idak nian.
Notísia relevante : Governu aprova revizaun polítiku ba OJE 2026-sei aprezenta ba PN
Molok tama Jornada Orsamentál, Ministériu Finansa tuir lei haruka manda ona tetu indikativu ba OJE 2026 nian ba Parlamentu.
“Tanba ne’e, daudaun ne’e atu haree filafali ministériu balun dehan tetu ne’ebé fó la sufisiente, entaun presiza haree, tanbá sá la sufisiente,” Ministra katak.
Proposta OJE 2026 ho montante biliaun $1,85, maibé daudaun ne’e hanesan tetu indikativu atu haree no análiza ba prioridade.
“Ministériu idaidak sei aprezenta nomós sei halo revizaun filafali atu haree prioridade loloos maka ida-ne’ebé. Normalmente aprezenta prioridade ita-nian ministériu hotu-hotu iha lista prioridade hotu kedas, maibé ita tenke haree mais prioridade atubele dentru de tetu ne’ebé ita iha, ou tetu ne’ebé razoavél ba Governu atu aprezenta ba Parlamentu Nasionál,” Ministra esplika.
Jornalista : Osória Marques
Editora : Julia Chatarina
