DILI, 05 Agostu 2025 (TATOLI) – Projetu konstrusaun infraestrutura bázika iha Bidau, eis-merkadu Sengol, iha Postu-administrativu Kristu rei, munisípiu Dili, ne’ebé Governu planeia halo mós jardin no rotunda, hatudu progresu ‘signifikante’.
Supervizór kompañia Montana Di’ak, José Pereira, informa, progresu konstrusaun ba projetu iha Bidau-sengol atinje ona 65%, tanba kompañia Montana Di’ak nahe ona alkatraun faze dahuluk nian ba estrada sorin, nune’e hein nahe tan alkatraun ba estrada sorin bele finaliza ona.
“Entaun projetu ne’e foin daudauk la’o tarde uitoan tamba ami-nia mákina ANP ne’e fallansu uitoan, maibé aban hanesan ne’e ita hahú nahe tan alkatraun ba iha estrada sorin”, supervizór kompañia ne’e hateten ba Agência TATOLI via telefone, ohin.
Supervizór ne’e dehan, projetu konstrusaun ne’e sei halo jardin fatin tolu, depois kompañia sira sei kuda plantasaun ruma, lampu, pavin ba ema defisiénsia hodi asesu no monta kadeira ba iha jardin laran, nune’e ema bele ba tuur halimar iha fatin ne’e.
“Ami mós sei konstrui rotunda rua, ida ki’ik sei estabelese iha perempatan (kruzamentu) Akadiruhun no rotunda boot sei implementa iha diresaun BJ Habibie, maibé prosesu sira-ne’e sei iha etapa ikus mai”, nia informa.
Enkuantu, antes ne’e, mós Ministru Obra Públika, Samuel Marçal, hateten, projetu iha Bidau-Sengol nian ne’e Governu iha ninia planu mak halo ona reabilitasaun ne’e, se Governu laiha planu normalmente sei la loke despezu administrativu iha fatin referidu.
Jornalista: Alexandra da Costa
Editór: Rafael Ximenes de A. Belo
