VIKEKE, 06 Agostu 2025 (TATOLI)—Diresaun Nasionál Transporte Terrestre (DNTT) no Polísia Nasionál Timor Leste (PNTL) Munisípiu Vikeke liuhusi Unidade Tránzitu sei fó teste ba motorista sira atu hetan karta kondusaun.
Diretór DNTT Munisípiu Vikeke, Saul Henrique haktuir dauduan ne’e DNTT Munisípiu Vikeke halo ona preparasaun hodi fó teste pratika tama roda ba motorista sira-ne’ebé trata dokumentu karta kondusaun.
“Kona-ba teste pratika ba karta kondisaun ne’e ita hahú halo preparasaun ona no ami mós halo ona koordenasaun ho parte PNTL hodi fó apoiu teste ba ita-nia kliente sira. Planu teste sei hala’o iha semana oin (11-15 Agustu ). Ami partilla ona informasaun ba kliente sira atu partisipa iha teste referidu,” Saul Henrique ba TATOLI iha Postu Vikeke Vila, Kuarta ne’e.
Saul hatutan teste pratika tama roda ne’e husi DNTT nasionál, akompañadu husi DNTT munisípiu no apoiu husi Unidade Tránzitu Vikeke.
Kona-ba fatin teste, nia dehan, pratika teste tama roda sei realiza iha kampu PNTL no Beskem. Tuir dadus, kliente hamutuk 603-resin mak daudaun iha lista DNTT Munisípiu Vikeke.
Jornalista: Vitorino Lopez da Costa
Editór: Xisto Freitas da Piedade
