VIKEKE, 06 Agostu 2025 (TATOLI)—Diretór Servisu Programa Nasionál Dezenvolvimentu Suku (PNDS) Munisípiu Vikeke, Fransisco Soares Varela informa ekipa Eletricidade de Timor-Leste (EDTL) deside halakan hikas enerjia eletrisidade ba benefisiáriu Uma Naroman ba Povu (UNP) unidade lima iha Suku Maluru, Postu Administrativu Vikeke Vila, Munisípiu Vikeke.
“UNP lima ne’e uluk ahi lakan, maibé tékniku EDTL identifika dada ilegál nune’e hakotu (korte) fiu ne’ebé liga bá uma referida iha tinan tolu liubá hodi fó multa hamutuk $14.000 no selu tiha mak foin dada filafali. Maibé, foin lalais ne’e Sekretáriu Estadu Agua no Saneamentu mai Vikeke ha’u aprezenta hafoin fó fali orientasaun ba EDTL Vikeke hodi dada filafali eletrisidade,” Fransisco Soares Varela ba TATOLI iha ninia kna’ar fatin, Kuarta ne’e.
Diretór PNDS Munisípiu Vikeke ne’e haktuir katak benefisiáriu uma-kain lima ne’e família vuneravel, tanba ne’e hetan osan ne’ebé selu kustu ho montante boot ne’e ($14.000), nune’e Sekretáriu Estadu orienta fali EDTL Munisípiu dada filafali eletrisidade ba UNP lima.
Iha fatin ketak, Xefe Suku Maluru, Bendito Soares hateten benefisiáriu rejista ona iha EDTL Vikeke no hahú dada eletrisidade ba benefisiáriu sira.
“Ita-nia família vulneravel uma-kain lima ne’ebé uluk EDTL korte sira-nia ahi ne’e, EDTL autoriza fali ona hodi dada filafali eletrisidade bá sira,” nia hato’o.
Jornalista: Vitorino Lopez da Costa
Editór: Xisto Freitas da Piedade
