DILI, 05 Agostu 2025 (TATOLI) – Embaixadora estraordinária, Maria de Lurdes Martins de Sousa Bessa simu orientasaun direta husi Primeiru-Ministru (PM), Kay Rala Xanana Gusmão, molok hala’o misaun hanesan reprezentante Estadu Timor-Leste (TL) iha Reinu Béljika.
Durante hasoru-malu iha Palasiu Governu ne’e, Primeiru-Ministru husu bá Embaixadora Besa atu hametin parseria ho Béljika no garante promosaun bá pás, kooperasaun no dezenvolvimentu ne’ebé mak mútu.
Antes ne’e Prezidente Repúblika (PR), José Ramos-Horta fó posse bá Maria de Lurdes Martins de Sousa Bessa nu’udar Embaixadora Estraordináriu no Plenipotensiáriu bá Reinu Béljika iha Palásiu Prezidensiál Nicolau Lobato iha loron 29 fulan-Jullu 2025.
Enkuantu Bessa sai Diplomata distintu ida ho esperiénsia barak iha área polítika, diplomátika no edukasaun. Aleinde ne’e nia mós okupa kargu hanesan Vise-Ministra Edukasaun no Kultura iha tinan 2017–2018, iha fali tinan 2012-2017 nia asume knaar hanesan membru Parlamentu Nasionál, nia mós kontinua sai Embaixadora bá Suísa iha tinan 2021–2024.
Kuaze nia envolvimentu barak tebes iha área oioin, tanba nia mós servisu hanesan Asistente Polítiku bá UNTAET, Asistente Pessoál bá eis-Prezidente Xanana Gusmão no Asistente Polítika iha Embaixada EUA iha Timor-Leste.
Tanba ne’e ho nia kontribuisaun, Prezidente Ramos-Horta kondekora ho Grau Kolár Órden Timor-Leste (2024). Bessa hanesan defensora ida bá direitu feto no juventude, hanesan autór bá livru “Loron Ida” no servisu ho Fundasaun Alola hodi promove kauza sosiál sira.
Jornalista: Alexandra da Costa
Editór: Rafael Ximenes de A. Belo
