Kondisaun Eskola Filiál Ferik Sare ladi’ak, deputadu husu intervensaun ME
DILI, 06 Agostu 2025 (TATOLI) – Kondisaun Eskola Bázika Filiál Ferik Sare, iha postu Alas, munisípiu Manufahi, ladún di’ak atu alunu sira uza ba prosesu aprendizajen.
Tanba ne’e, deputadu husi Partidu Demokrátiku (PD), Manuel Henrinque Noronha, levanta kestaun ne’e iha reuniaun plenária Komisaun Permanente, ohin, no husi Ministériu Edukasaun atu presta atensaun.
“Ha’u semana kotuk vizita bá Ferik Sare, postu administrativu Alas, hasoru autoridade balun no komunidade hato’o preokupasaun relasiona ho kondisaun Eskola Bázika Filiál Ferik Sare, ne’ebé hetan konstrusaun iha tinan 2004 no to’o agora eskola nia kondisaun ladi’ak no grave”, deputadu ne’e dehan.
Tuir nia, ho kondisaun eskola ne’e bele fó ameasa ba estudante sira bainhira hala’o hela sira-nia prosesu ensinu aprendizajen iha aula laran. “Tanba kalen komesa ku’ak, plafón nakloke no ai tabele”, nia preokupa.
Eskola ne’e iha estudante hamutuk 332, tanba ne’e reprezentante povu ne’e hato’o ba Ministériu Edukasaun atu haree no identifika karik iha eskola balun iha territóriu nia kondisaun hanesan ne’e bele tau planu prioridade hodi halo reabilitasaun.
“Nune’e, bele fó espasu ba estudante sira eskola karik ho hakmatek, hodi partisipa ensinu aprendizajen”, nia hato’o.
Jornalista: Nelson de Sousa
Editora: Maria Auxiliadora
