MCI diskute ho autoridade Kovalima identifika produtu potensiál sira
KOVALIMA,06 Agostu 2025 (TATOLI)- Ministériu Komérsiu Indústria (MCI), liuhusi diresaun Nasionál Peskiza no Estatístika, iha inisiativa hodi dezeña konseitu postu administrativu ida ho nia produtu ida ho nia sigla (P1 P1), nune’e halo diskusaun ho autoridade hodi tau hanoin hamutuk, oinsá atu indentifika produtu potensiál sira iha munisípiu Kovalima.
“Daudaun-ne’e, ami halo identifikasaun oinsá mak ita identifika kada postu administrativu ida ho iha nia produtu ida, tanba ne’e ami realiza enkontru ho autoridade Kovalima, sosiedade sivíl ho parseiru dezevolvimentu sira atu tau hanoin hamutuk”, Reprezentante Diresaun Nasionál Peskiza no Estatístika MCI, Donatos da Conceicão Martins dehan ba jornalista, iha salaun Administrasaun Postu Suai,Tabakolot ohin.
Produtu ne’ebé mak presiza ho prinsípiu husi obok signifika produtu ne’ebé mak bele kompetetivu iha merkadu lokál, Nasionál no mós merkadu Globál.
Regra produtu ne’ebé mak atu tama iha obok haree ba setór agrikultura hanesan peska, pekuária Floresta,indústria mikro sira, nia produtu ekonomikamentu ne’e viavel duni bele kompete iha merkadu presiza atu diversifika produtu
“Ita sei la’o hamutuk ho ita-nia autoridade sira, haree produtu nia produsaun ho nia kuantidade hira ne’ebé atu konsumu iha merkadu lokál no nasionál no kuantidade produtu hira mak ita bele halo esportasaun”, nia dehan.
Entretantu, Sekretáriu Munisipál Asuntu Sosiál no Organizasaun, Filomeno Cardoso, dehan programa atu identifika produtu sira kada postu administrativu bele empodera ekonomia iha postu administrativu sira.
“Programa ida-ne’e tuir loloos implementa ona iha tempu IV Governu konstituisionál, maibé la konsege, tanba ne’e Governu da-sia mak ita haree fali, postu hotu bele hatene no fó prioridade ba produtu ida, nune’e ita bele hasa’e ona ita-nia produsaun kada postu administrativu ne’ebé ita iha, maibé presiza haree mós rekursu sira kada postu”, nia afirma.
Autoridade ne’e dehan ho implementasaun programa ne’e bele fó oportunidade ba postu administrativu sira, atu identifika nia produtu sira, nune’e bele empodera atividade ekonómia iha postu liuliu iha munisípiu Kovalima.
Sekretáriu mós husu ba administradór postu administrativu sira tuur hamutuk hodi fó idea ba malu , atu bele identifika no ona prepara produtu hodi bele responde ba implementasaun podér lokál iha tinan oin.
Jornalista :Celestina Teles
Editór:Florencio Miranda Ximenes
