DILI, 06 Agostu 2025 (TATOLI)-Polísia Nasionál Timor-Leste liuhusi Diresaun Servisu Investigasaun Kriminál Nasionál ezekuta mandadu Tribunál Judisiál Primeira Instánsia Dili (TJPID) ho NUC 086/25-PNSIK hodi halo buska no apreensaun ba Reitór Universidade Nasionál Timor Lorosa’e (UNTL), Vise Reitór ba Asuntu Administrasaun Finansa no Administradór Jerál inklui kargu xefia na’in-haat seluk.
Medida judisiál ne’ebé halo husi autoridade polisiál tanba interveniente sira presumível ba krime falsifikasaun dokumentu ka notasaun téknika, ne’ebé akontese iha 2024. Violasaun ne’e previstu iha artigu 303 husi kódigu penál Timor-Leste nian.
Artigu 303 (falsifikasaun ba dokumentu ka notasaun téknika) alínea 1) Ema ne’ebé, ho intensaun atu halo aat ba ema seluk ka Estadu, ka atu hetan ba sira-nia an rasik ka ba ema seluk, benefísiu ilejítimu: a) Fabrika dokumentu falsu ka notasaun téknika, falsifika ka altera dokumentu-ida, ka abuza asinatura hosi ema seluk hodi kria dokumentu falsu; b) Hateten ho falsu faktu legalmente relevante iha dokumentu ida ka notasaun téknika; c) Falsu atestadu, bazeia ba koñesimentu profisionál, tékniku, ka sientífiku, kona-ba kondisaun fíziku ka mentál ka kualidade ema ida nian, animál, ka sasán; d) Uza dokumentu ruma ka notasaun téknika sira ne’ebé refere iha parágrafu anteriór sira, fabrikadu ka falsifika ka hasai hosi ema seluk; sei hetan pena prizaun to’o tinan-tolu ka multa.
Alínea 2) Kualkér asaun disruptiva iha dispozitivu tékniku ka automátiku ne’ebé maka hetan influénsia ba rezultadu notasaun nian hanesan ho falsifikasaun notasaun téknika nian. Alínea 3) Kualkér tentativa bele hetan kastigu.
Buska no apreensaun ne’e autoridade polisiál sira halo iha tuku 9:30 no konklui iha tuku 13:00. Ekipa lidera husi Diretór Diresaun Servisu Investigasaun Kriminál Nasionál, Superintendente Polísia João Belo dos Reis.
Antes ezekuta tarefa, mandadu judisiáriu husi tribunál ne’e lee sai husi Superintendente Assistente Polísia Almerio Filipe Nicolau Dias Quintas ba Reitór UNTL, João Soares Martins no interveniente sira.
“Ohin ami mai iha ne’e hodi ezekuta mandadu judisiál husi Tribunál Judisiál Primeira Instánsia Dili ho NUC 086/25-PNSIK, ba krime falsifikasaun dokumentu ka notasaun téknika, tanba ne’e husu ba señor autoriza ami atu halo buska no apreensaun ba sira ne’ebé konsta iha mandadu ne’e no fatin sira ne’ebé rai faktu sira”, Almeiro lee sai mandadu judisiáriu ba Reitór iha Gabinete Reitoria UNTL, Kaikoli, kuarta-ne’e.
Depois rona no intende, Reitór UNTL, João Soares Martins, autoriza ekipa halo buska no apreensaun. “Sim, ita-boot sira bele halo buska iha ne’e”.
Buska no apreensaun ne’ebé ekipa halo ba gabinete reitoria, inklui departamentu payroll no kontabilidade, akompaña direta husi interveniente sira.
Iha buska no apreensaun ne’e polísia mós arrola dokumentu no faktu seluk, ne’ebé sei sustenta ba investigasaun.
Durante buska no apreensaun, ekipa investigadór la autoriza funsionáriu sira tama sala laran, maibé autoriza de’it interveniente sira mak akompaña hodi esplika konaba departamentu payroll no kontabilidade nia servisu ba funsionáriu sira iha gabinete reitoria inklui departamentu ne’ebé mak ekipa halo buska.
Depois arrola nesesidade investigasaun iha universidade, ekipa desloka ba rezidénsia Reitór iha Bekora, Vise Reitór iha Vilaverde. Enkuantu, dirijente na’in-haat seluk hanesan diretór DPP, diretór DPP UNTL, diretór DNFP no diretór rekursu umanu, ekipa sei rekolla dadus sira iha loron aban ba ida-idak nia rezidénsia.
Buska no apreensaun ne’e hetan apoiu seguransa husi Batallaun Orden Públika.
Notísia relevante: Ekipa konjunta buska Diretór PNDS Manatutu
Jornalista : Natalino Costa
Editora : Rita Almeida
