DILI, 06 Agostu 2025 (TATOLI) – Sentru Formasaun Teolojia-Igreja Protestante iha Timor-Leste (SFT-IPTL) no Institutu Superiór Filozofia no Teolojia (ISFIT) husi Igreja Katólika realiza konferénsia hodi selebra tinan 1700 Credo Niceia.
Selebrasaun tinan ne’e ho tema “Echoes of Niceia” no ninia subtema: “Haburas fiar, Selebra Unidade iha Diversidade”.
Sekretáriu SFT-IPTL, Levi de Vasconcelos Pinto, hateten atividade ne’e hanesan selebrasaun Credo Niceia ne’ebé kompleta tinan 1700 nian. Credo Niceia inisia nu’udar kredo tuan liu no sai nu’udar aliserse fiar kristaun nian ne’ebé rekoñesidu iha igreja hotu-hotu.
Nia dehan organizasaun atividade ne’e husi família boot Igreja Kristu nian iha mundu no mós iha Timor-Leste hodi selebra legadu fiar ne’ebé importante tebes.
Igreja rua organiza hamutuk atividade ne’e nu’udar momentu Credo Niceia selebra iha ambiente ne’ebé família husi parte Maromak nian.
“Atividade ne’e ho objetivu primeiru mak atu hakle’an koñesimentu hamutuk kona-ba rikeza ne’ebé Credo hato’o hela mai ami, no mós oinsá atu halo reflesaun kle’an husi Credo Niceia iha kontestu Timor-Leste nian”, nia hateten ba Tatoli iha Komoro, ohin.
Aleinde selebra hamutuk ho diversidade tradisaun no fiar, nune’e oinsá uza sai hanesan rikeza ida ne’ebé bele hariku no haforsa malu hodi hala’o evanjellu no misaun Maromak nian.
Nia esplika kona-ba subtema ne’ebé hili tanba igreja rua hakarak valoriza rikeza diversidade ne’ebé iha, maibé iha unidade nia laran. “Hanesan mós ita fiar Na’i Maromak ida de’it, aman, oan no espíritu santu”, nia hateten.
Atividade ne’e hala’o durante loron tolu, entre 6-8 Agostu tinan ne’e. Iha loron dahuluk, sesaun abertura iha mós oradór sira aprezenta matéria istóriku no pontu importante sira husi Credo Niceia. Loron tuirmai kontinua ho semináriu halo reflesaun husi perspetiva Igreja Katólika no Protestante kona-ba Credo Niceia hodi foku ba parte unidade no habelar evanjelizasaun.
“Sei ko’lia mós kestaun ekolójika ne’ebé daudaun mundu enfrenta no asuntu Intelejénsia Artifisiál oinsá haree ba future”, realsa.
Iha fatin hanesan, Reitór ISFIT, Padre Justino Tanec, realsa katak Igreja Katólika no Protestante iha Timor-Leste, liuhusi meiu oioin hakarak kria no promove unidade iha país ne’e nu’udar sinál Maromak halo povu ida de’it ne’ebé fiar ba Maromak liuhusi nia oan Jesus Kristu iha espíritu santu.
“Maski diversidade barak, iha Igreja Katólika no Protestante, maibé ita buka pontu enkontru ida mak orasaun Credo ne’e rasik”, nia hateten.
Saserdote ne’e salienta katak igreja rua ne’e profesa fiar ne’ebé bazeia ba fórmula Credo Niceia ne’ebé konvoka konsellu ida ne’e iha tinan 325 no agora selebra tinan ba da-1700.
“Iha enkontru ba tinan ne’e, ami hakarak foku liu Credo Niceia ne’ebé sai nu’udar pontu unidade ba kristaun sira hotu. Pur tantu envez ita buka diferensa, ita mós buka hanesan buat ne’ebé halo ita hamutuk”, dehan.
Iha atividade ne’e importante mós halo orasaun hamutuk de’it, maibé reflete maneira teolójika, istórika, litúrjika bazeia ba kredo ida-ne’e.
Jornalista: Nelson de Sousa
Editora: Maria Auxiliadora
