DILI, 07 Agostu 2025 (TATOLI) – Autoridade Inspesaun, Fiskalizasaun Atividade Ekonómika Sanitária no Alimentar (AIFAESA) liuhusi Departamentu Metereolojia Padronizasaun, kontinua halo inspesaun ba estabelesimentu komersiál ba materiál konstrusaun nian iha área kapitál Dili ho objetivu atu garante nafatin onestidade no laiha manipulasaun ba medida produtu sira, husi proprietáriu sira.
Xefe Departamentu Metereolójia Padronizasaun, José Reis Amaral, hateten husi identifikasaun mak iha empregadór sira fa’an materiál konstrusaun nia medida sira balun tau informasaun iha sasan no balun la sita informasaun ruma.
“Tanba ne’e mak ami hakarak identifika de’it atividade ne’ebé mak durante ne’e hala’o tuir hela regra kalae, entaun ohin ita haree balun manipula medida la tuir loloos husi materiál sira-ne’e, tanba balun tau medida metru 6.6 maibé bainhira ami sukat lato’o medida ne’ebé ami sukat”, Xefe departamentu ne’e informa ba jornalista sira iha Hudi-Laran, kuarta ne’e (06/08/2025).
Ho nune’e nia hateten, AIFAESA divulga ona informasaun ba loja-na’in sira, bainhira la kumpri sei fó koima ki’ik liu maka ho montante $2.500,00 no boot liu mak $75.000,00
“Ami fó tempu ba sira durante fulan ida, maibé karik sira la kumpri nafatin ami sei foti materiál sira lori ba tau iha armajen AIFAESA nian, depois mak desizaun husi inspetora katak atu entrega ba Governu ka ajuda ba vulneravel sira”, nia afirma.
Tanba ne’e sira mós rekomenda ba Institutu Kualidade Timor-Leste (IQTL, sigla portugés) kria padraun lei hodi fortifika kualidade ba materiál konstrusaun tuir padraun no ajuda servisu AIFAESA nian iha terrenu.
Iha oportunidade ne’e tuir loja-na’in Digao, Wenhy, nia parte prontu koopera ho servisu AIFAESA nian ne’ebé ba halo inspesaun ona ninia loja.
“Ha’u sei orienta traballadór sira hakerek informasaun klaru ba iha kada sasan ne’ebé ami fa’an”, nia kompromete.
Properitáriu Loja Dgao ne’e mós informa katak, materiál konstrusaun sira-ne’e importa husi nasaun rua mak hanesan Xina no Indonézia (Surabaya), tanba ne’e nia garante kualidade sasan nian ba kompradór sira.
“Ami mós sei tau presu ho justu tuir medida ne’ebé ami hakerek no hamoos loja-laran hodi garante nia ijíene”, nia garante.
Entretantu, atividade inspesaun ne’e, AIFAESA hala’o iha loja materiál konstrusaun tolu hanesan, loja Digao, Yimei no Cha, ne’ebé lokaliza iha área Hudi-Laran, suku Bairru-Pité, no tuir informasaun AIFSESA sei kontinua halo inspesaun iha semana oin fali mai hodi garante katak loja-na’in sira kumpri orden.
Jornalista: Alexandra da Costa
Editór: Rafael Ximenes de A. Belo
