VIKEKE, 07 Agostu 2025 (TATOLI)—Autoridade sira kompostu husi reprezentante Autoridade Munisípiu Vikeke, PNTL no sira seluk hahú halo preparasaun hodi forma komisaun organizadora ba selebrasaun loron Forças Armadas da Libertação Nacional de Timor-Leste (FALINTIL) ba dala-50 (20 Agostu 1975-20 Agostu 2025) ne’ebé sei realiza iha Munisípiu Vikeke.
Selebrasaun loron FALINTIL ba dala-50 iha Vikeke ne’e lidera husi Sekretáriu Autoridade Munisípiu Vikeke ba Asuntu Sosiál no Organizasaun Komunitária, Acacio de Sousa.
“Preparasaun Loron 20 Agostu ami forma ona komisaun ida hodi lidera serimónia ne’ebé realiza iha Munisípiu Vikeke. Nune’e, ha’u nafatin fó-hanoin ba ita hotu hodi hamutuk komemora loron FALINTIL nu’udár loron istóriku,” Acacio hateten iha Salaun Administrasaun Munisípiu Vikeke, Kinta ne’e.
Prezidente Komisaun ne’e relata atividade komemorasaun loron FALINTIL mak hanesan desportu, parada militár, misa ba eroi sira no atividade sira seluk.
“Ha’u nafatin fó-hanoin ba estrutura komisaun sira idak-idak tenke hatene ninia devér atu nune’e ita organiza ita-nia serimónia komemorasaun bele la’o ho di’ak,” nia hato’o.
Iha parte seluk, Reprezentante Komandante Polísia Munisípiu Vikeke atuál Komadante Eskuadra Vikeke Vila, Inspetór Polísia Venceslau Moreira de Oliveria Freitas husu Vikeke-oan no komisaun sira servisu hamutuk hodi asegura loron komemorasaun FALINTIL iha Munisípiu Vikeke.
“Ita hotu hatene FALINTIL nu’udár lutu nasaun nian, tan ne’e ita tenke servisu hamutuk hodi asegura serimónia komemorasaun loron FALINTIL ba dala-50 la’o ho di’ak. PNTL prontu asegura serimónia komemorasaun loron FALINTIL, tanba ne’e ami husu komunidade mai ita hamutuk hodi asegura ita-nia serimónia,” nia hato’o.
Jornalista: Vitorino Lopez da Costa
Editór: Xisto Freitas da Piedade
