DILI, 07 Agostu 2025 (TATOLI)-Diretór Diresaun Servisu Investigasaun Kriminál, Superintendente Polísia João Belo dos Reis, hatete ekipa servisu ne’ebé halo buska no apreensaun ba Reitór Universidade Nasionál Timor Lorosa’e (UNTL), Vise Reitór, no kargu xefia nain-haat seluk sei iha tempu oras 72 hodi halo arrolamentu ba dokumentu.
“Ligadu ba buska no apreensaun ne’e ninia prosesu investigasaun la’o hela, to’o oras 72 sei aprezenta ba Ministériu Públiku”, Superintendente Polísia João Belo dos Reis ba jornalista sira iha Ministériu Interiór Vila-Verde, kinta-ne’e.
Notísia relevante: PNTL halo buska no apreensaun ba Reitór UNTL inklui kargu xefia na’in-lima
Nia dehan PNTL seidauk submete auto notísia buska no apreensaun ba Ministériu Públiku tanba presiza arrola tán dokumentu balun ba parte sira ne’ebé hanesan intervenente iha prosesu ne’e.
“Ami ezekuta de’it mandadu husi tribunál hodi halo buska no apreensaun, la detensaun. Ami sei submete de’it mandadu ne’ebé fó ba ami”, nia afirma.
Nia informa, buska no apreensaun ne’e konsege rekolla dokumentu importante sira husi ema na’in-neen ne’ebé sai hanesan prezumível iha prosesu ne’e.
“Husi buska no aprensaun ne’e ami konsege dezenvolve ami-nia investigasaun, ami kolleta sasán sira ne’ebé ami buka”, nia konklui.
Jornalista : Natalino Costa
Editora : Rita Almeida
