Família sente triste lakon ema matenek no umilde hanesan Saudozu Alcino Barris
DILI, 07 Agostu 2025 (TATOLI)—Reprezentante família, Rolavio Tomás de Araújo, sentre triste tanba lakon ema ne’ebé matenek no umilde iha família no sosiedade, hanesan Saudozu Alcino Barris.
Antigu Prezidente Komisaun Nasionál Eleisaun (CNE, sigla portugés) ne’e hakotu iis iha loron 04 Agostu 2025 iha tuku 11:00 kalan no husik hela nia kaben no oan feto ida.
“Sente triste lakon alin matenek, pasiénsia, umilde iha família, sosiedade no nasaun ida-ne’e. Ami sente lakon boot no ha’u atu temi nia naran de’it ha’u laran tanis no laran susar tebes,” Rolavio Tomás hato’o ba Ajénsia TATOLI, hafoin Misa Requem, iha Igreja Katedrál, Vila-Verde, Kinta ne’e.
Notísia relevante : Prezidente CNE orienta funsionáriu sira halo preparasaun ba eleisaun prezidensiál 2022
Padre Pároku Igreja Katedrál Dili, Paulos Maia iha nia omília hateten, buat hotu iha Maromak nia planu.
“Ita hotu-hotu só entrega de’it ba Maromak no ita só aseita, tanba ne’e Maromak nia planu. Destinu iha Maromak nia liman,” Padre Paulos Maia, katak.
Nune’e, Amu husu atu família no ema hotu hamutuk hodi halo orasaun ba saudozu hodi hetan fatin naroman iha Na’in kadunan Santu.
Biografia
Alcino de Araújo Barris, moris iha Ainaro, iha loron 23 Dezembru 1964, nu’udar oan dalimak husi maun alin na’in-neen, kompostu husi mane haat no feto rua. Oan husi Alcino Carvalho de Araújo (matebian) no Ana Maria de Araújo (matebian).
Alcino Barris, ho personalidade husi kiik kedas gosta lee livru no gosta desportu.
Formasaun akadémika
Hahú nia edukasaun bázika iha Ainaru, iha tempu portugués no iha tempu Indonézia nian, nia kontinua eskola iha SMEA Becora, Dili.
Ho bolsa estudu ne’ebé Governadór Mário Carrascalão fó ba estudante timoroan sira, nia gradua iha tinan 1992, nu’udar lisensiadu iha Direitu, ‘Hukum Perdata’ iha Universidade Udayana Denpasar, Bali, Indonézia.
Filafali mai Timor, nia hahú nia karreira nu’udar funsionáriu públiku, hanesan Xefe Divizaun ba Asuntu Legál iha munisípiu Ainaru husi tinan 1993-1995.
Hafoin knaar ida-ne’e, nia muda fali bá Surabaya hodi halo knaar nu’udar dosente iha Fakuldade Direitu iha Universidade Widya Karya husi tinan 1997-1998, iha tempu ne’ebé nia hala’o nia knaar nu’udar dosente, nia mós uza nia tempu hodi hala’o estudu ba Mestradu iha área Siénsia Sosiál iha Universidade Airlangga, Surabaya, Jawa Timur, Indonézia.
Hafoin hasai tiha Mestradu, nia fila hikas mai Ainaru no kontinua serbisu iha área legál to’o Referendu 1999.
Pós-Referendu iha tinan 2000-2003, nia asume kargu nu’udar Prokuradór Jerál da Repúblika nomós asume kargu nu’udar Xefe Prokuradoria Distritál Dili.
Iha tinan 2003-2004 nia asume kargu nu’udar Vise-Ministru Administrasaun Interna ba Primeiru Governu Konstitusionál. Iha tinan 2004-2006 nu’udar Prezidente Gabinete Inspesaun iha Ministériu Interiór.
Iha tinan 2006-2007 nia asume pasta nu’udar Ministru Interiór iha Segundu no Terseiru Governu Konstitusionál.
Husi tinan 2007-2012 nu’udar membru Konsellu Superiór Defeza Seguransa, no Asesór ba Reforma no Dezenvolvimentu iha setór seguransa, iha Prezidénsia Repúblika Timor-Leste, iha períodu ne’ebé hanesan sai mos nu’udar membru Konsellu Superiór Ministériu Públiku.
Iha tinan 2009-2017, nu’udar membru Konsellu Superiór Defensoria Públika. Iha tinan 2009-2013 nu’udar Komisáriu ba CNE no Responsável ba Sub-Komisaun ba Partidu Polítiku no Subvensahn Públika.
Iha tinan 2013-2016, asume pasta nu’udar Komisáriu CNE no Responsável munisípiu Ainaru no Responsável Sub-Komisaun Keixa no Reklamasaun. Hahú husi tinan 2015 nu’udar Advogadu privadu.
Iha tinan 2016-2021, nia asume pasta nu’udar Prezidente CNE. Iha tinan 2017-2022 nia sai membru Konsellu Estadu.
Iha tinan 2021-2026, kontinua serbisu iha CNE nu’udar Komisáriu. Iha tinan 2023 haneaan Asesór Legál ba Ministru Koordenadór Asuntu Ekonómiku.
Iha 1975-1980, Alcino Barris partisipa iha filleira rezisténsia nian iha rai-laran. Iha tinan 1980-1999 nu’udar membru klandestina.
Hafoin iha tinan 1999, nu’udar Koordenadór ba ‘Sucesso de Referendum Pro-independência’ iha Kabupaten Ainaru.
Jornalista : Osória Marques
Editora : Julia Chatarina
