Komunidade Uatulari preokupa ho peste hamate manu lokál
VIKEKE, 07 Agostu 2025 (TATOLI)—Komunidade Postu Administrativu Uatulari, Munisípiu Vikeke preokupa ho peste ne’ebé daudaun ne’e atake komunidade nia animál (manu lokál) sira.
Abitante Suku Uaitame, António Pinto hakuir paste derepente atake manu iha fulan-Juñu to’o Jullu, iha-ne’ebé hamate manu husi lima ba leten iha kada loron.
“Peste ne’e atake manu kuaze 100 mak mate ona. Ami sente triste haree peste ne’ebé daudaun atake manu lokál sira,” António Pinto ba TATOLI iha Postu Administrativu Uatulari, Kinta ne’e.
Nia hatutan katak sira informa ona ba téknika veterinária iha Postu Uatulari hodi sira oferese ai-moruk atu kontra peste referidu, maibé manu kontinua mate.
Iha fatin ketak, tékniku veternáriu destakadu Postu Uatulari, Agapito da Silva haktuir katak sira iha estoke ai-moruk vasinasaun hodi vasina manu sira-ne’e no balun sira labele kobre tanba distánsia dook.
Notísia relevante: Governu aprova proposta lei atu kontrola pestisida
Nia relata katak dezafiu ne’ebé veterinária Uatulari hasoru mak menus rekursu hodi kobre suku ualu iha Postu Uatulari, hodi halo prevensaun ba peste ne’e.
“Menus rekurusu ne’e ha’u hato’o ona ba ami-nia diresaun. Espera bá-oin ne’e bele aumenta rekursu liuliu téknika veterinária nian,” nia subliña.
Jornalista: Vitorino Lopez da Costa
Editór: Xisto Freitas da Piedade
