MAPPF sei distribui fini hare no batar tonelada 330
DILI, 07 Agostu 2025 (TATOLI) – Diresaun Nasionál Agrikultura, Ortikultura no Protesaun Planta iha Ministériu Agrikultura Pekuária, Peska no Floresta (MAAPF) distribui, iha tinan ne’e, fini hare tonelada 200 no batar 130 ba agrikultór sira iha munisípiu hotu.
“Orsamentu ne’ebé ita sosa ba fini batar no haree hamutuk rihun $400-resin. Fini balun ita sosa iha rai-laran no rai-li’ur”, Diretór Nasionál Agrikultura, Ortikultura no Protesaun Planta, Lúcio Nuno, dehan ba Tatoli iha Komoro, ohin.
Lembra katak iha tinan kotuk, fulan-Outubru no Novembru, MAPPF fahe uluk ona hare tolelada 120 no batar 100.
“Husi fini ne’ebé ita distribui [kuda ona iha rai] ektare 37.691 iha munisípiu sira hanesan Bobonaru, Ermera, Likisá no seluk tan. Tuir previzaun, karik rezultadu di’ak hotu, tinan ne’e ita sei kolleta hare tonelada 158.274 [no konverte] ba foos tonelada 91.964”, nia informa.
Ministériu mós apoia subsídiu kombustivel ba agrikultór sira iha munisípiu hodi halai natar, tanba ida-ne’e polítika Governu nian atu tulun agrikultór sira hodi hasa’e produsaun iha rai-laran.
MAPPF prevee rihun $500-resin ba kombustivel gratuitu no jere husi Serbisu Agrikultura Munisípiu hodi atende agrikultór sira.
“Rezultadu [produsaun] ne’ebé iha atu fa’an ka la’e ne’e depende ba agrikultór sira, tanba ministériu nia programa mak atu hasa’e produsaun tenke apoiu subsídiu kombustivel”, nia esplika.
Jornalista: Arminda Fonseca
Editora: Maria Auxiliadora
