DILI, 06 Agostu 2025 (TATOLI)—Reitór Universidade Nasionál Timor-Lorosa’e (UNTL), João Soares Martins, informa, universidade iha espesialidade ba área jornalizmu tanba ne’e presiza fó bolsa estudu ba jornalista sira.
“Ida-ne’e Fundu Dezenvolvimentu Kapitál Umanu (FDCH, sigla portugés) sira mak fó bolsa estudu. Karik bolsa referidu mak iha di’ak liutá atubele ajuda fasilita formasaun ba estudante sira foti kursu komunikasaun sosiál,” Reitór hato’o ba jornalista sira, iha resintu edifísiu Ministériu Finansa, Aitarak-laran, Kuarta ne’e.
Nia dehan, daudaun UNTL seidauk iha akordu formál ruma ho asosiasun jornalista sira no Ministériu Ensinu Superiór Siénsia no Kultura (MESSK).
Nune’e, iha fulan-Juñu liubá, Governu liuhusi Sekeretáriu Estadu Komunikasaun Sosiál, Expedito Loro Dias Ximenes, informa katak sei oferese bolsa estudu ba jornalista sira, ne’ebé halo serbisu iha órgaun komunikasaun sosiál sira iha territóriu.
“Governu iha hanoin atu fó bolsa estudu ba jornalista seniór sira ne’ebé hakarak kontinua estudu iha depertamentu komunikasaun sosiál,” Expedito dehan.
Notísia relevante : FDCH prepara $900.000 ba programa bolsa méritu iha tinan 2025
SEKOMS halo ona koordenasaun ho MESSK atubele haree kona-ba kritériu sira ne’ebé atu fasilita jornalista sira atu asesu ba ensinu superiór iha territóriu nasionál.
“Ba bolsa estudu ne’e komforme ami-nia koordenasaun ho Ministériu Ensinu Superiór, Siénsia no Kultura, másimu na’in-10, tanba ne’e ami sei aprezenta kritériu sira no bainhira priense ona kritériu sira ne’e mak ami sei propoin ba Ministériu Ensinu Superiór, Siénsia no Kultura,” nia katak.
Sekretáriu Estadu hateten, bolsa estudu referidu espesífiku ba nível lisensiatura, maibé karik mídia ne’ebé iha de’it ema lisensiatura no sira propoin sira-nia jornalista kontinua ba mestradu mós bele, importante prienxe rekezitu ne’ebé Governu estabelese.
Ensinu superiór sira ne’ebé jornalista sira sei halo estudu ba mak hanesan UNTL, Universidade Orientál (UNITAL) no Universidade Katólika Timorense (UCT, sigla portugés).
Jornalista : Osória Marques
Editora : Julia Chatarina
