CCLN Vikeke realiza konferénsia daruak hili estrutura foun
VIKEKE, 08 Agostu 2025 (TATOLI)—Konsellu Kombatente Libertasaun Nasionál (CCLN- sigla portugeza) Munisípiu Vikeke, Sesta ne’e, realiza konferénsia nivel munisípiu hodi hili estrutura foun Konsellu Kombatente Libertasaun Nasionál Munisípiu Vikeke ba tinan 2025-2030.
Iha konferénsia ne’e, Ministru Asuntu Kombatente Libertasaun Nasionál, Gil da Costa Monteiro “Oan Soru” haktuir estrutura CCLN Vikeke ne’ebé eleje iha aban (Sábadu) atu servisu tuir lei mak estatutu kombatente artigu 35 iha númeru hateten CCLN úniku órgaun ne’ebé reprezenta interese kombatente sira-nian no Dekretu-lei nú33/2024 kona-ba orgánika CCLN nian nune’e serbí tenke tuir regra sira-ne’e.
“Liuhusi lei sira-ne’e mak ita bele hatene ita-nia área sira. Ho nune’e mak legalidade sira-ne’e bele proteje ita. CCLN nian devér ida mak rezolve problema veteranu sira-nian. Hanesan ministru, halo jestaun administrativa de’it, maibé la halo desizaun sira,” Gil da Costa Monteiro hateten iha ámbitu abertura konferénsia daruak CCLN, iha Salaun Tilou, Postu Vikeke Vila.
Governante ne’e sujere delegadu kongresista sira hili estrutura ne’ebé ho responsavel nune’e asumi kna’ar iha CCLN karik halo buat ruma.
Oan Soru apela ba veteranu sira katak maski partidu ketak-ketak, maibé asuntu veteranu ne’e ida de’it, tanba ne’e mak harii bandeira sira-ne’e.
Iha biban ne’e, Prezidente Konsellu Kombatente Libertasaun Nasionál, Vidal de Jesus “Riak Leman” informa konferénsia durak ne’e realiza iha tinan 2024, maibé estende tinan ida, tanba ne’e mak agora foin realiza konferénsia ida-ne’e hodi hili estrutura CCLN Munisípiu Vikeke hodi lidera CCLN iha munisípiu ida-ne’e.
“Konferénsia ne’e ita realiza iha munisípiu hotu no konferénsia nasionál ba CCLN nian sei realiza iha fulan-Dezembru 2025. Asumi kna’ar ba CCLN servisu todan ida mak rejistu veteranu nian ne’ebé seidauk finalizadu. Tan ne’e, ha’u husu veteranu munisípiu Vikeke sé-sé mak eleitu ba CCLN atu hadi’a no rezolve problema veteranu nian, sei la tau interese individuál,” nia hato’o.
Entretantu, Prezidente Autoridade Munisipál Vikeke, Francisco C. S de Gonzaga Soares orgullu partisipa iha konferénsia daruak CCLN ne’ebé realiza iha Munisípiu Vikeke.
“Ha’u sente orgullu reprezenta Autoridade Munisipál Vikeke partisipa iha konferénsia ida-ne’e. Liuhusi konferénsia ida-ne’e atu hadi’a buat balun ba asuntu kombatente. Durante ne’e, estrutura CCLN Munisípiu Vikeke sempre koopera ho ha’u ba dezenvolvimentu iha Munisípiu Vikeke. Tan ne’e, ha’u espera liuhusi konferénsia ida-ne’e bele melloria servisu sira no hametin servisu ho autoridade sira,” nia subliña.
Partisipa iha konferénsia daruak CCLN Munisípiu Vikeke ne’e partisipa husi estrutura CCLN nasionál, reprezentante FALINTIL- Defeza Timor-Leste (F-FDTL), Komandante Polísia Nasionál Timor-Leste (PNTL) Munisípiu Vikeke, Diretór Munisipál, Autoridade Lokál no veteranu sira husi postu administrativu lima iha Munisípiu Vikeke.
Jornalista: Vitorino Lopez da Costa
Editór: Xisto Freitas da Piedade
