DILI, 08 Agostu 2025 (TATOLI) – Konferénsia daruak kona-ba Ekonomia no Negósiu Timor-Leste no Austrália (TLAUCON2025) realiza mós feira komersiál hanesan plataforma hodi promove produtu no serbisu lokál sira ne’ebé inovativu hodi atrai investimentu.
Prezidente Kámara Komérsiu no Indústria Timor-Leste, Jorge Serrano, hateten konferénsia durante loron rua, entre 07 no 08 Agostu ne’e, halo diskusaun kle’an kona-ba oportunidade no dezafiu halo negósiu iha Timor-Leste.
Diskusaun ne’e foka ba setór prinsipál sira hanesan agrikultura, turizmu, manufatura no prosesamentu, no minerál no rekursu.
Feira komérsiu ida-ne’e mós envolve empreza sira hodi hatudu sira-nia produtu no servisu sira iha setór prinsipál sira ne’e.
“Empreza sira lori sira-nia produtu mai atu hatudu katak sasán saida mak sira iha no haree nia kualidade, tanba agora ita tama ona ba Organizasaun Mundiál Komérsiu no iha prosesu tama ba ASEAN. Entaun, ita presiza tebes haree produtu sira ne’ebé iha ho kualidade”, Jorge Serrano hateten iha Sentru Konvensaun Dili, ohin.
Iha feira ne’e, emprezáriu sira husi Austrália sei haree no fahe sira-nia esperiénsia kona-ba produsaun nian no atu haree buat ne’ebé sira prodús no Timor-Leste prodús ne’e hanesan sira-nian ka la’e.
“Tanba padraun kualidade Austrália nian ne’e di’ak, entaun ida-ne’e mós bele ajuda ida atu haree ita-nia kualidade produsaun sira ne’e no sertifikasaun sira, nune’e fasilita ita-nia produtu sira tama iha merkadu ho fásil”, dehan.
Tuir ni,a ohin loron ne’e produtu atu tama iha merkadu internasionál presiza sertifikasaun, entaun Austrália iha esperiénsia no koñesimentu di’ak kona-ba ida-ne’e no sira-nia produtu kualidade iha merkadu internasionál, entaun sira nu’udar país viziñu ne’ebé bele aprende ho sira.
Iha fatin hanesan, Diretór Ezekutivu Adjuntu TradeInvest Timor-Leste, Duilio Marino Gusmão Araújo da Silva, hateten objetivu prinsipál husi konferénsia ida-ne’e atu konekta setór privadu timoroan no australianu.
Konferénsia ne’e importante atu esplora setór privadu iha Timor-Leste, hodi promove peskiza, manufatura, indústria no turizmu ne’ebé sai pilár importante, ne’ebé nakloke ba iha setór privadu Austrália.
Na’in ba empresa Lokál Runa’s Crochet (RC), Virgínia Amaral Soares, hatetene nia parte promove produtu sira ne’ebé sira halo hanesan pasta, brinku, karteira, no sasán ba labarik sira atu halimar, no mós sasán sira ne’ebe bele halo dekorasaun ba uma. “Iha Runa’s Crochet ne’e ami halo crochet uza rasik liman, halo pasta, iha asesores karteira, sasan labarik, no seluk tan”, nia dehan.
Ba nia, feira ne’e importante tanba bele tulun empreza lokál sira hetan koneksaun ho loja sira, nune’e bele hatama produtu sira, liuliu Timor Plaza no seluk tan. “Durante partisipa iha feira ne’e konsege hetan rendimentu liu $100. Eventu ida-ne’e sai esperansa ba ami atu serbisu maka’as, bele lori ami-nia produtu bá iha merkadu hodi bele hetan osan”, dehan.
Produtu sira ne’ebé aprezenta iha feira ne’e mak hanesan tais, kafé, kakau, Sea Mos Timór no seluk tan.
Notísia relevante: Konferénsia TLAUCON2025: Xanana apela ba setór privadu kria empregu no valoriza produtu nasionál
Jornalista: Arminda Fonseca
Editora: Maria Auxiliadora
