VIKEKE, 06 Agostu 2025 (TATOLI)—Xefe Suku Ossú de Cima, Postu Administrativu Ossú, Munisípiu Vikeke, Celestino M. de Carvalho informa impedimentu ba konstrusaun irrigasaun Logobere, Suku Ossú de Cima, Postu Administrativu Ossú, Munisípiu Vikeke rezolvidu maibé empreza seidauk mai halo servisu.
“Kona-ba irrigasaun Logobere ne’e ita-nia komunidade mak halo impedimentu. Ha’u halo esforsu konsege rezolve ona, maibé empreza la’o lakon tiha ona. Ne’ebé, agora daudaun abandonadu,” Celestino ba TATOLI iha Postu Ossú, Kuarta ne’e.
Autoridade ne’e haktuir nia tenta kontatu empreza responsavel maibé empreza referida la simu telefone.
“Ha’u telefone ona diretór empreza maibé la simu telefone. Uluk seidauk rezolve impedimentu ne’e empreza ezije loos atu rezolve lalais impedimentu. Agora rezolve tiha empreza abandona fali servisu. Hmm.. Se fulan ida-ne’e mak sira la mai servisu, ha’u prosesa ona empreza tanba komunidade fó ona apoiu másimu ba konstrusaun irrigasaun,” nia haktuir.
Nia hatutan katak autoridade suku aprezenta ona karta ba Diresaun Nasionál Irrigasun husi Ministériu Agrikultura, Peska, Pekuária no Floresta (MAPPF) atu haree asuntu irrigasaun ne’e.
“Fulan ida-ne’e ramata mak sira seidauk mai servisu, ha’u sei aprezenta ba Prezidente Autoridade Munisípiu Vikeke no Ministériu Agrikultura hodi orienta auditória para buka tuir tanbasá mak la implementa obra,” nia realsa.
Iha fatin ketak, Diretór MAPPF Munisípiu Vikeke, Olívio Soares Freitas informa katak nia sei halo konfirmasaun ba parte empreza responsavel tanbasá obra ne’e seidauk la’o.
Razaun komunidade antes ne’e halo impedimentu tanba irrigasaun halai liuhusi komunidade nian natar. Nune’e, foin lalais autoridade hamutuk ho empreza rezolve liuhusi indemnizasaun ba natar na’in sira-ne’ebé irrigasaun halai kona hamutuk na’in-17. Empreza indemniza kada natar $50.
Enkuantu, konstrusaun eskema irrigasaun Logobere ho montante $300.000 husi Orsamentu Jerál Estadu (OJE) 2025 ne’ebé konstrui husi empreza Haberan Unipessoal, Lda. Irrigasaun referida sei benefísia abitante Suku Ossú de Cima ho total populasaun 4.263, kompostu husi aldeia hanesan Bakalsi, Belas, Borala, Kai Uai Ho O, Liamida, Lugabuti, Uairio, Uma Ana Iko no mós suku viziñu sira.
Jornalista: Vitorino Lopez da Costa
Editór: Xisto Freitas da Piedade
