VIKEKE, 08 Agostu 2025 (TATOLI)—Ministru Asuntu Kombatente Libertasaun Nasionál, Gil da Costa Monteiro “Oan Soru” husu veteranu Munisípiu Vikeke atu idak-idak hakerek ninia istória hodi sai memória ba jerasaun foun sira.
“Ha’u husu veteranu sira iha Munisípiu Vikeke atu idak-idak hakerek ninia istória, tanba imi-nia rate aban bainrua ema sei la valoriza, maibé imi-nia istória mak ema sei valoriza. Tan ne’e, sujere veteranu sira hakerek ninia istória hodi rai hela ba jerasaun foun sira,” Gil da Costa hateten iha iha Salaun Ti’ilou, Postu Vikeke Vila, Sesta ne’e.
Governante ne’e haktuir katak iha Munisípiu Vikeke foin ema ida husi Uatukarbau mak hakerek istória pasada, maibé livru istória ne’e agora daudaun sei rai hela iha Ministériu Asuntu Veteranu maibé iha pájina haat ka lima de’it.
“Se agora imi la hakerek, tempu ruma imi laiha tiha, imi-nia istória lakon ona. Nune’e, oportunidade agora ne’e imi aproveita hakerek daudaun ona idak-idak nia istória ba ita-nia jerasaun sira tuirmai,” nia hato’o.
Jornalista: Vitorino Lopez da Costa
Editór: Xisto Freitas da Piedade
