DILI, 08 Agostu 2025 (TATOLI) – Ministériu Petróleu no Rekursu Minerál (MPRM) hafoin halo ezersísiu no ajustamentu ba programa sira bazeia ba Orsamentu Jerál Estadu (OJE) 2026, ne’ebé distribui husi Ministériu Finansa, husu adisionál millaun $100-resin iha reuniaun Komité Revizaun Orsamentu (KRO).
Ministru Petróleu no Rekursu Minerál, Francisco Monteiro, hateten tetu ne’ebé sira simu husi Ministériu Finansa hamutuk millaun $40,6. Montante ne’e aloka bá saláriu no vensimentu millaun $1,2, bens no servisu $14,4 no transferénsia públika millaun $25.
“Husi orsamentu ne’e ami elabora ba planu no programa prioridade ministériu nian iha nesesidade husu adisionál millaun $100-resin. Ida-ne’e ba planu no prioridade rua iha tinan oin mak petróleu no minerál”, Francisco Monteiro hateten iha Ministériu Finansa, ohin.
Ministru esplika kona-ba setór petróleu no minerál ne’e importante tebes, tanba petróleu ne’e daudaun iha faze negosiasaun no estudu tékniku importante sira ne’ebé bele lori Timor-Leste ba konvense no afirma dada kadoras Greater Sunrise no Bayu Undan mai iha Natarbora hodi dezenvolve indústria petrolífera.
“Implementasaun projetu Tasi-Mane Suai Supply Base no autoestrada tenke la’o. Kona-ba parte minerál nian, tinan kotuk no tinan ida-ne’e, ita intensifika loloos lisensiamentu ba esplorasaun balun iha rai-laran ne’ebé fatin balun fó ona lisensiamentu no balun seidauk, ita kontinua iha tinan oin”, nia dehan.
Ba empreza sira ne’ebé hetan ona lisensa, sira komesa serbisu no hein katak tinan oin bele iha ona rezultadu balun iha parte mineiru nian.
Kona-ba ezekusaun Orsamentu Jerál Estadu (OJE) tinan 2025, MPRM no instituisaun tutelada sira atinji ona 50%-resin, garante katak iha fulan oin mai ezekusaun sei sa’e maka’as tanba daudaun iha projetu balun mak sei iha faze konkursu nia laran.
Jornalista: Arminda Fonseca
Editora: Maria Auxiliadora
