DILI, 08 Agostu 2025 (TATOLI)—Ministériu Transporte Komunikasaun (MTK) ezekuta Orsamentu Jerál Estadu (OJE) 2025, husi Janeiru to’o Jullu ne’e, atinje ona 43%.
Ministru Transporte no komunikasaun, Miguel Marques Gonçalves Manetelu, hateten ezekusaun OJE 2025 foin atinje 43% ne’e, tanba iha bens servisu ba MTK hanesan sapa matríkula, karta kondusaun no libretí (STNK).
“Ohin, ha’u temi katak ba oin ita sei uza reseita ne’ebe investe husi bens servisu nian, ne’ebé prosesu konkursu públiku la’o hela. Nia osan boot tanbá ne’e mak kontribui ba bens servisu nia ezekusaun ne’e sei kiik,” Ministru ne’e informa ba jornalista sira iha Ministériu Finansa, Aitarak-Laran, kinta (07 Jullu 2025) ne’e.
Aleinde ne’e, governante ne’e hatutan, saláriu vensimentu mós nia ezekusaun to’o de’it fulan-Juñu foin mak atinje 38%, tanba peoblema ne’e ema balun dehan saláriu de’it la to’o 50% ne’e maibe razaun tanba destakamentu ba funsionáriu sira iha Ajénsia Autonoma sira-ne’ebé tutela ba MTK ne’e hamutuk 111-resin, no funsionáriu sira-ne’e bainhira foti lisensa sein iha vensimentu ba servisu iha ajénsia sira-ne’e.
“Tanba sira-ne’e funsionáriu públiku, entaun sira-nia saláriu tinan-tinan Governu sempre aloka nafatin, tanba ne’e kontribui ba taxa ezekusaun nian,” nia hateten.
Nune’e, funsio’náriu termu sertu sira iha fulan-Jullu ne’e seidauk halo pagamentu tanba termu sertu sei asina kada fulan-neen, nune’e mak iha fulan-Jullu nian seidauk transfere ba sira-nia salariu. Funsionáriu termu sertu kuazé 300-resin, entaun ida-ne’e mos kontribui ba ezekusaun OJE 2025 ne’e foin atinje 38%.
Antes ne’e, iha kinta (15 /11/2024), Parlamentu Nasionál aprova OJE 2025 ba Ministériu Transporte no Komunikasaun (MTC, sigla portugés) ho totál Orsamentu $13.353.528.
Orsamentu refere fahe ba kategoria Saláriu e Vensimentu $4.659.105, Bens e Serviços $6.336.053, Transferencias Publika $1.811.500, Kapitál Menor $250.000 no Kapitál Dezenvolvimentu $296.870.
Jornalista : Alexandra da Costa
Editór : Cancio Ximenes
