BAUKAU, 08 Agostu 2025 (TATOLI)—Pesóal saúde ho kategoria rejime espesiál hamutuk na’in-13 iha Munisípiu Baukau tama ona iha idade reforma.
Diretór Serbisu Munisipál Saúde Baukau, Cristiano Cipriano Belo esplika saúde Baukau halo identifikasaun no rekolla ona dadus funsionáriu hirak-ne’e ne’ebé idade 65 ba leten hodi submete ba nasionál hafoin simu oreintasaun husi Ministériu Saúde.
“Sira-ne’e idade 65 ona. Efetividade servisu komesa menus entaun ita presiza tau-atensaun hodi nune’e karik desizaun ne’ebé mai ita tenke re-funsionáriu hodi hadi’a di’akliu tan kualidade serbisu hodi atende povu,” Diretór Serbisu Munisipál Saúde Baukau hateten iha ninia kna’ar fatin, Vila Antiga, Baukau, Sesta ne’e.
Cristiano Belo relata funsionáriu na’in-13 referidu kompostu husi asistente infermeiru no infermeira ne’ebé atualmente hala’o kna’ar iha Saúde Munisípiu, Sentru Saúde Tirilolo, Postu Saúde Buruma, Sentru Saúde Kelikai, Venilale no Uailili.
Serbisu Saúde Baukau rejista mós funsionáriu rejime jerál na’in-lima kategoria idade reforma ne’ebé hala’o kna’ar iha saúde munisípiu na’in-haat kompostu grau D na’in-ida, E na’in-ida, F na’in-rua, enkuantu na’in-ida seluk grau F iha Sentru Saúde Venilale.
“Ita ezekuta ona orientasaun hodi relata ba ministériu, enkuantu desizaun hotu iha nasionál,” Cristiano Belo informa.
Entretantu, serbisu saúde rejista funsionáriu kategoria rejime espesiál hamutuk 228 kompostu husi infermeiru, infermeira, parteira inklui tékniku aliadu no funsionáriu rejime jerál 198 kompostu husi médiku, infermeira, tékniku aliadu, motorista, admistrasaun ne’ebé koloka iha serbisu munisipál, sentru saúde sia no postu saúde 30.
Aleinde ne’e, Autoridade Munisípiu Baukau mós fó kontratu ba funsionáriu kazuál hamutuk na’in-24 ne’ebé apoiu serbisu atendimentu saúde ba komunidade iha Munisípiu Baukau.
Jornalista: Natalino Belo
Editór: Xisto Freitas da Piedade
