DILI, 08 Agostu 2025 (TATOLI) – Relasiona ho reseita husi Fundu Petrolíferu ne’ebé komesa tun, Prezidente Repúblika (PR), José Ramos-Horta, hateten katak Governu tenke utiliza orsamentu tuir duni planu no prioridade ne’ebé iha.
Xefe Estadu dehan Governu deside ona orsamentu tinan 2026 hamutuk billaun $1,8 no tenke mantein despeza ne’e, tanba ba oin se laiha finansiamentu foun husi kampu petrolíferu, turizmu no mineru seluk.
Prezidente Horta mós ko’alia kona-ba despeza barak ne’ebé Governu presiza atu ko’a, menus ba setór sira hanesan edukasaun, saúde, agrikultura no esforsu hodi kombate stunting no deznutrisaun.
“Ezemplu, ita gasta osan boot ba kombustivel karreta Estadu nian, ida-ne’e gasta osan de’it”, Ramos-Horta, afirma iha semináriu nasionál ho tema “Konseitu Estadu no Vizaun Estratéjika ba Dezenvolvimentu Nasionál”, iha Fomentu, ohin.
Nia haktuir katak Timor-Leste nu’udar nasaun datoluk ne’ebé nia ministru no sekretáriu Estadu sira tenke iha karreta foun no iha seguransa.
“Ha’u mak primeiru-ministru, ha’u fó bisikleta ba Sekretariu Estadu sira uza.Tanba ida-ne’e di’ak ba saúde. Motorista sira ka’er karreta Governu nian ne’e, kuandu ministru enkontru loron tomak karreta ne’e mós para loron tomak liga ho ár kondisionadu. Ha’u la hatene, kada ministériu sira ne’e kontrola limete ba despeza kombustivel ka la’e”, nia kestiona.
Nia dehan iha Palásiu Prezidénsia, tau kontrola limete ba despeza kombustivel ne’ebé uluk kada semana ba karreta ida fó $40, maibé agora hatún ba $30.
“Bainhira ha’u la’o liu bá karreta seguransa sira no rona AC ligadu hela, ha’u haruka Xefe Kaza Sivíl hatún ba $30 kada karreta”, Xefe Estadu ne’e subliña.
Atu jere didi’ak orsamentu mak Xefe Estadu sujere labele halo gastu maka’as no dezenvolve fali ba setór seluk, tanba Timor-Leste iha rikusoin barak hahú husi mina, gás, manganés mármore no seluk tan.
Jornalista: Arminda Fonseca
Editora: Maria Auxiliadora
