DILI, 08 Agostu 2025 (TATOLI) – Governu presiza tau atensaun maka’as hodi dezenvolve setór produtivu iha rai-laran hanesan agrikultura no turizmu tanba iha sustentalidade ba nasaun.
Reitór Institute of Business (IOB), Pedro Barreto Ximenes, hato’o iha ámbitu semináriu nasionál ne’ebé organiza husi Ajénsia Tatoli I.P hamutuk ho IOB ho tema “Konseitu Estadu no Vizaun Estratéjika ba Dezenvolvimentu Nasionál”, ne’ebé realiza iha Fomentu, ohin.
Tuir nia, dezenvolvimentu nasaun daudaun la sustentavel tanba sei depedénsia barak liu ba Fundu Mina-rai nu’udar rekursu ne’ebé hotu lalais no tuir previzaun sei ratama iha tinan 2032.
“Se ita laiha alternativa seluk, nasaun monu iha bankarota. Entaun, atu sai sustentavel, ita tenke muda ona ita-nia foku. Ekonomia la’ós bazeia ona ba mina, maibé primeiru tenke bazeia ba ema hanesan foku ba dezenvolvimentu. Segundu, ita tenke haree la’ós ona ba mina mak finansia rai ne’e, maibé atividade produtiva ne’ebé iha rai-laran”, reitór ne’e hateten ba Tatoli iha kampus IOB, Fomentu, ohin.
Nia observa katak dezenvolvimentu país tinan 23 ona no buat barak parte Ezekutivu halo ona ho di’ak, maibé sei falta mós buat barak. “Ida-ne’e presiza tempu no prosesu no parte hotu ninia partisipasaun atu lori nasaun ba oin”, nia dehan.
Jornalista: Nelson de Sousa
Editora: Maria Auxiliadora
