BAUKAU, 07 Agostu 2025 (TATOLI)—Ekipa Selesaun Nasionál Futeból Feminina Timor-Leste derrota 7-0 bainhira kontra ekipa Filipina iha jogu Asian Football Federation (AFF) Women’s Championship ne’ebé realiza iha Vietnam, Kinta ne’e.
Iha jogu volta dahuluk zona klasifikasaun, ekipa Lafaek forma ho estratéjia defensiva 5:3:2 iha-ne’ebé jogadora J. Soares no Silva Costa nu’udár avansada maibé estratéjia referida rezulta Timor-Leste lakon golu 7-0 husi ekipa nasionál Filipina.
Notísia relevante: Kapitán Selesaun Nasionál Futeból Feminina garante hatudu performance iha jogu AFF Women’s Championship
Golu hitu referida, ekipa Filipina prodús golu haat iha primeira volta hafoin inísiu árbitu lian liuhusi jogadora A. Schinaman minutu 2, Q, Quezada minutu 7, 32 no H. Long iha minutu 9.
Enkuantu, golu tolu seluk prodús iha jogu parte daruak nian, iha-ne’ebé enxe husi jogadora D. Tolentin iha minutu 57 no 64, inklui jogadora A. Wyrzynski iha minutu 75.
Entretantu, ekipa feminina sénior koloka iha grupu B hamutuk ho nasaun tolu seluk hanesan Austrália, Myanmar no Filipina nune’e provizoriamente, ekipa Lafaek iha pozisaun dahaat iha tabela klasifikasaun ho pontu 0, rezultadu husi derrota 1 ho produtividade golu -7.
Jornalista: Natalino Belo
Editór: Xisto Freitas da Piedade
