BAUKAU, 08 Agostu 2025 (TATOLI)—Serbisu Munisipál Saúde Baukau (SMSB) hamutuk ho FALINTIL-Forsa Defeza Timor-Leste (F-FDTL) realiza konsulta saúde durante loron-rua iha Munisípiu Baukau relasiona ho selebrasaun loron Forças Armadas da Libertação Nacional Timor-Leste (FALINTIL) ba dala-50 (20 Agostu 1975-20 Agostu 2025).
Diretór Serbisu Munisipál Saúde Baukau, Cristiano Cipriano Belo esplika atividade referida realiza liuhosi kooperasaun ho F-FDTL ne’ebé hala’o iha Suku Samalari, Postu Administrativu Baukau Vila no Namanei, Postu Kelikai Antigu iha-ne’ebé konsege halo konsulta espesializada ba komunidade hamutuk 540.
“Atividade ne’e lori saúde hakbesik ba komunidade liuliu iha área ne’ebé rurál tebes ho objetivu atu halo redusaun tranferénsia kazu espesializada mai nivel aas iha sentru saúde sira,” Diretór Serbisu Munisipál Saúde Baukau hateten iha ninia kna’ar fatin, Vila Antiga, Baukau, Sesta ne’e.
Cristiano Belo haktuir konsulta espesializada referida halo tratamentu ba saúde inan, ruin, matan, moras laran no moras seluk tan ne’ebé halo atendimentu direta hanesan utiliza moos, ekipamentu portable X-ray no fahe ai-moruk tuir situasaun iha terrenu.
Atividade konsulta konjunta ne’e, SMSB hamutuk ho F-FDTL sempre hala’o kada trimestrál bazeia ba planu atividade programa integradu hafoin profisionál saúde deteta kazu moras husi suku.
“Ami halo kada suku loron-ida. Suku Samalari komunidade ne’ebé konsulta hamutuk 266, Suku Namanei nia komunidade ne’ebé partisipa hamutuk 274,” Cristiano Belo tenik.
Jornalista: Natalino Belo
Editór: Xisto Freitas da Piedade
