OEKUSI, 08 Agostu 2025 (TATOLI) – Uma-kain haat sei kontinua hela iha iha arredór merkadu tradisionál Numbei, lokaliza iha aldeia Sanane suku Costa sub-rejiaun Pante Makasar Rejiaun Administrativa Espesiál Oekusi Ambeno (RAEOA), no lakohi hamamuk fatin tanba rekoñese rai ne’ebé sira hela dezde 1974 to’o ohin loron.
Notísia relevante:Negosiante Numbei preokupa ho kondisaun merkadu provizóriu ne’ebé Autoridade RAEOA kria
Abitante Armindo Pereira, nu’udar na’in ba rai iha merkadu Numbei, informa, katak, totál okupante atu hala’o negósiu hamutuk uma-kain 144 daudaun ne’e hamamuk ona sira-nia hela-fatin, maibé uma-kain haat sei kontiua hela tanba hela iha rai privadu.
“Ami ne’ebé hela iha merkadu ne’e iha uma-kain 144, maibé ami uma-kain haat rai ne’e privadu, la’ós foin mak mai atu hela, maibé hela kedas iha 1974, merkadu ne’e mós seidauk mai, estrada haleu mós seidauk iha rai ne’e fuik hela ho ai laran tuan, agora ami-nia uma seidauk sobu no ami sei kontinua hela, kooperasaun husi Governu,” nia hateten, iha ámbitu enkontru ho ekipa konjunta sira iha merkadu Numbei, kinta ne’e.
“Ami kontinua hela no hein, maibé Governu seidauk iha kooperasaun ho ami, atu mai ko’alia ho ami uma-kain haat ne’e, foin daudaun SEATOU mai, ha’u hato’o ba nia, maibé dehan ne’e responsabilidade husi Autoridade RAEAO, agora ami kontinua hein, ami sei koopera tan ne’e ami-nia uma no mós rai, ami hela atu buka moris, ne’ebé tenke mai atu esklarese mai ami, fó klaru mai ami, atu sai ka hela, maibé rai ne’e privadu la’ós rai Estadu,” nia dehan.
Notísia relevante:Abitante 156 iha merkadu Numbei koopera ho Governu sobu rasik uma-kioske
Hatan ba problema, ne’e Diretór Diresaun Rejionál Terra Propriedade, Júlio Coel, rekoñese uma-kain sei kontinua hela, nune’e iha tempu-badak ekipa konjunta sei hala’o enkontru espesiál atu rekolla dokumentu komprovativu ba estatutu rai ne’e.
“Kompleksu merkadu ne’e, rai Estadu mai kedan husi tempu okupasaun. Agora Estadu presiza atu halo hadi’a merkadu ne’e, maibé iha ema balun mak reklama nu’udar rai privadu, entaun ami sei tetu, karik sira iha dokumentu komprova, bele liuhusi kompensasaun maibé sira-ne’ebé halo uma iha rai Estadu iha merkadu Numbei ne’e, iha ami-nia enkontru ekipa ne’e, Autoridade RAEOA hanoin hela atu fó orsamentu rekuperasaun de’it la’ós indemnizasaun tanba hela iha rai Estadu,” nia hateten.
Notísia relevante:Autoridade RAEOA aloka rihun $120 hadi’a merkadu tradisionál Numbei
Jornalista: Abílio Elo Nini
Editór: Rafael Ximenes de A. Belo
