EDTL aprezenta orsamentu adisionál millaun $50 ba programa haat iha 2026
DILI, 09 Agostu 2025 (TATOLI)—Prezidente Komisaun Ezekutiva Eletricidade de Timor-Leste, Empreza Públika (EDTL, E.P.), Paulo da Silva hateten iha enkontru Komité Revizaun Orsamentu Polítika (KROP) 2025, sira aprezenta proposta orsamentu adisionál 2026 ho montante millaun $50 ba programa prioridade haat.
Paulo esplika programa prioridade haat mak hanesan millaun $32 sei aloka hodi sosa kombustivel ba sentru elétriku Hera no Betanu, millaun $9 aloka ba solár PV no bátria ba Ataúru, millaun $6 aloka ba kabu subterráneu hodi ilumina estrada protokolu sira iha Dili laran no aldeia sira no millaun $10.8 aloka ba operasaun manutensaun elétrika.
Notísia relevante: Reseita EDTL durante Janeiru-Juñu hamutuk millaun $35,8
Aleinde ne’e, Paulo informa EDTL ezekuta ona orsamentu 2025 atinje 30% (ezekuta ba manutensaun, projetu eletrifikasaun, projetu rurál no operasaun saláriu vensimentu no se liga ho obrigasaun ne’e bele liu 70% tanba kontratu hotu-hotu hein selu de’it bainhira ema fornese mina mai.
“Ita bele garante katak to’o fulan-Dezembru bele ezekuta to’o 90%, maibé depende ba ita-nia parseiru sira hanesan kompañia sira-ne’ebé implementa obra. Se sira halo hotu lalais no hatama facture invoice mai bele halo pagamentu,” Prezidente ne’e informa ba jornalista sira hafoin remata enkontru KRO iha Ministéria Finansa, Aitarak-Laran, Sábadu ne’e.
Prevee millaun $18 ba instalasaun iha nivel aldeia
Entretantu, Prezidente Komisaun Ezekutiva EDTL esklarese Orsamentu Jerál Estadu (OJE) 2026 sei tau prioridade hodi halo instalasaun eletrisidade ba nivel aldeia hamutuk 186 ne’ebé seidauk asesu eletrisidade.
“Ita-nia alvu iha 2026 ema iha aldeia hotu-hotu bele asesu ona enerjia eletrisidade. Tanba ita atu hasa’e rásiu eletrifikasaun nasionál, iha nivél aldeia nian mak ita tau aldeia 186 ne’e atu rezolve iha 2026 ho orsamentu millaun $18,” nia subliña.
Nune’e afirma katak ninia dezeñu no Bill of Quantities (BoQ) kompletu tiha ona, tan ne’e iha fulan-Agostu nia rohan EDTL sei halo prosesu aprovizionamentu no tinan oin kompañia sira hahú implementa instalasaun.
Jornalista: Alexandra da Costa
Editór: Xisto Freitas da Piedade
