DILI, 09 Agostu 2025 (TATOLI)–Ekipa Médika Sirúrjia-Plastic hosi Austrália na’in-haat kompostu hosi infermeira na’in-rua, operadór na’in-ida no médika anastésia na’in-ida, fó ona atendimentu ba labarik sira hanesan ibun sakat, isin-kulit ahi han no bee manas luhas iha Hopital Nacional Guido Valadares (HNGV), Bidau, Sábadu ne’e.
Médiku Sirúrjia-Plastic, Mark Moore hateten ekipa Médika Sirúrjia-Plástiku ne’e mai iha Hospital Nacional Guido Valadares atu halo atendimentu ba labarik sira-ne’ebé problema ibun sakat, isin-kulit ahi han no bee manas luhas sira nee sei opera iha loron 11-15 Agostu tinan ne’e.
“Ha’u mai iha HNGV ba dala-rua ona maibé iha nasaun Austrália ba dala-50 ona hodi fó konsulta bebé no labarik sira-ne’ebé la hetan tratamentu adekuadu,” Mark Moore informa.
Nia dehan ekipa sempre servisu hamutuk ho Hospital Nacional Guido Valadares hodi fó atendimentu ba labarik sira ibun sakat baibain (cleft lip simple), ibun sakat kompleksu (cleft lip complex) no isin-kulit ahi han no bee-manas luhas (queimaduran no contracture).
Mark sente triste tanba labele fó konsulta ba ema hotu iha vizita ne’e, tanba pasiente sira-ne’e barak, entaun balun filafali bá uma hodi hein loron tuirmai.
“Karik sira mai hosi dook, entaun ami koko atu fó konsulta ka operasaun ba ema na’in- 40 ka 50 iha semana ida nia laran,” nia relata.
Iha fatin hanesan, Inan Celviana dos Reis Araújo nu’udár inan ba labarik Clauricia Maria da Silva sente kontente bainhira hetan informasaun iha mídia sosiál katak ekipa Médika Sirúrjia-Plástiku sei fó konsulta no operasaun ba bebé no labarik sira ibun sakat no sira seluk, nune’e nia lori nia oan ba konsulta iha ekipa médika sira hodi fó konsulta ba nia oan, nune’e nia oan bele hetan tratamentu di’ak.
Nia haktuir katak maski maihosi munisípiu dook, maibé nu’udár inan sente orgullu lori nia oan mai konsulta, tanba ida-ne’e foin dahuluk ba hasoru ekipa Médika Sirúrjia-Plástiku sira-ne’e.
Ekipa Médika Sirúrjia-Plastic sira-ne’e sei fó konsulta ba labarik sira durante semana ida nia laran iha sala OPD HNGV.
Jornalista: Felicidade Ximenes
Editór: Xisto Freitas da Piedade
