DILI, 10 Agostu 2025 (TATOLI)—Halimar ho fuan, la’ós ho ego. Futeból ne’e kona-ba ekipa, la’ós indíviduu. Hamutuk forte, fahe malu fraku.
Koroa Dili ka babain koñesidu ho Karketu Dili “Matak Malirin” justifika ona sira-nia sólidu. Sira halimar ho espíritu solidariedade. Ba sira, susesu iha futeból presiza kooperasaun no komunikasaun ne’ebé di’ak.
Susesu sein hakat liu sakrifísiu, ne’e la’ós futeból. Bainhira sakrifísiu ne’e hetok boot, hetok iha sabór vitória. Matak Malirin sai ezemplu. Ho sira-nia unidu, sira nunka lakon iha LFTL époka 2025 ne’e. Sira kandidatu forte ba kampiaun. Prova ne’e sira hatudu tan dala ida hafoin halakon adversáriu Assalam FC ho golu mihis 1-0 iha jornada dahitu jogu kontinuasaun Liga Futeból Timor-Leste (LFTL) époka 2025 ne’ebé hala’o iha Estádiu Munisipál Dili, Domingu ne’e.
Husi vitória ne’ebé klube jigante ne’e rekolla, lori kedas ekipa Matak Malirin túr aas-liu iha tabela klasifikasaun provizória ho pontu 19 no loke dalan ba Karketu atu sai ona kampiaun iha époka ne’e.
Hanesan babain no tuir kultura futeból nian, antes jogu hahú iha kampu matak nia leten, árbitru huu apitu hodi fó tada katak jogu hahú. Jogadór sira pasa kedas bola husi ain bá ain ho tékniku no abilidade ne’ebé atribui ona husi treinadór.
La’ós novidade ona. Satán jogu foin hahú, iis sai sasukat. Normalmente jogadór sira iis kuda. Iis nakonu. Halai lahatene kolen. Tanba ne’e, Assalam utiliza kedas oportunidade ne’ebé iha hodi lansa atake ne’ebé maka’as hasoru Karketu. Karketu la pániku. Sira responde ho kalma. La agresivu maibé hamate de’it Assalam nia jogu.
Assalam mós Assalam. Maski Karketu tenta hamate sira maibé falla. Sira nafatin domina bola husi minutu dahuluk. Husi kampu nia ninian, drama orientasaun la’o namanas. Treinadór Karketu hakilar nia jogadór sira atu antesipa agresividade Assalam ne’ebé tesik ba la sidi no la kait ne’e. Agresividade foin lentu iha minutu 20. Husi ne’e, Karketu foin organiza-aan ho di’ak. Sira hahú hetan hikas sira-nia ritmu jogu hodi luta hasoru adversáriu.
Hanesan Jet F-16 be lansa atake inimigu, Karketu lansa atake barak ba Assalam halo Assalam la hakmatek. Sorte defeza sólida. Tan ne’e, avansadu Karketu nian susar atu ultrapasa.
Jogu atrativu. Adeptu sira iha tribun leten suporta sira-nia ekpa ho idak-idak nia maneira. Balun hakilar bravo. Balun haksesuk malu. Balun hamnasa no hananu. Jogadór ekipa rua motivadu liután ho adeptu sira-nia motivasaun ne’e.
Ekipa rua nia luta hakarak atu hetan rezultadu iha iha primeira parte falla. To’o iha minutu 45, mehi hela ho mehi. Rezultadu hela ho impata 0-0.
Iha segunda parte, marka luta ida nia rohan. Ekipa rua hatudu vontade enérjiku atu manán jogu. Lansa atake ne’ebé frontál. Maski enérjiku, Assalam lakon domina bola. Karketu iha pozisaun seguru tanba domina bola. Avansadu Daniel Adadi (10), tenta ameasa ho nia xutu no kabesada sira ba guarda-rede Assalam maibé la rezulta golu tanba defeza Assalam la fó leet.
Karketu muda nafatin sira-nia estratéjia hodi antesipa adversáriu nia ofensividade. Karketu hala’o jogu badak liuhusi pasajen bola husi ain bá ain no evita bola long. Sira la ansi halo golu bainhira seidauk iha oportunidade.
Laiha buat ne’ebé instantáneu. Susesu ida presiza tempu no esforsu ne’ebé maka’as. Husi mudansa ne’ebé Karketu halo, iha minutu 64, jogadór médiu Daniel Gaio (7) hahú lansa golu liuhusi xutu maka’as ida halo guarda-rede Assalam susar atu antesipa no bola tama liubá rede laran. Bola golu. Simu ka la simu, rezultadu nakfilak ba 1-0.
Assalam namlaik. Golu ne’e hamonu kedas Assalam nia mentál. Husi tribun leten, adeptu Assalam nian mós lian laek ona. Trauma ho golu dahuluk. Husi parte sorin, festa sein múzika. Jogadór Karketu ho nia adeptu sira haklalak la para hodi selebra sira-nia rezultadu.
Karketu asua’in duni. Husi golu ne’e, hasa’e liután ninia espíritu jogu. Assalam tenta atu kombate Karketu nia tátika maibé kbiit laek. Karketu halo blokeia no dezmantela tutuir Assalam nia jogu to’o minutu 90 termina no adisiona tan minutu haat (4), la rezulta ona golu. Vitória hela ho Karketu no Assalam hela ho derrota.
Daudaun ne’e, tabela klasifikasaun provzória lidera husi Karketu FC ho pontu 19, Emmanuel FC iha pozisaun daruak ho pontu 13, Assalam FC iha pozisaun datoluk ho pontu 11, AS Marca FC iha pozisaun dahaat ho pontu ualu (8), Porto Taibessi iha pozisaun dalimak ho pontu ualu (8), DIT FC iha pozisaun daneen (6) ho pontu (5), AD SLB iha pozisaun dahitu (7) ho pontu lima (5), Ponta-Leste iha pozisaun daualu ho pontu lima (5), Akadémika FC iha pozisaun dasiak (9) ho pontu lima (5) no ikus liu Coração FC ho pontu haat (4).
Husi jogu ne’ebé hala’o tama ona ba jornada dahitu no sei hela jogu rua ba ekipa sanulu (10) iha Primeira Divizaun. Bainhira jogu rua ikus termina, foin hatene ekipa ne’ebé mak sai kampiaun, maski Karketu iha oportunidade barak liu atu sai kampiaun.
Jornalista: Hortencio Sanchez
Editór: Xisto Freitas da Piedade
