MTK iha planu atu halo investimentu privadu hasa’e reseita Estadu
DILI, 08 Agostu 2025 (TATOLI)—Ministru Transporte Komunikasaun, Miguel Marques Gonçalves Manetelu hateten Ministériu Transporte Komunikasaun (MTK) iha planu atu halo investimentu privadu hodi reforsa meiu hasa’e reseita ba kofre Estadu.
“Agora buat ne’ebé ha’u ko’alia ne’e reseita ne’ebé tama no bá iha kofre Estadu. Maibé, bainhira imi husu dehan iha medida hodi hasa’e reseita, sim. Ami iha no daudaun ne’e haree hela xapa matríkula ne’e ami koko atu la husu osan husi Estadu. Ami hakarak ba investimentu privadu,” Ministru Miguel Manetelu informa ba jornalista sira iha Ministériu Finansa, Aitarak-Laran, Sesta ne’e.
Governante ne’e dehan ministériu halo hela diskusaun para haree termu referénsia hotu mak sira sei avansa bá-oin no bainhira buat ne’e konkluidu ona liuliu koordenasaun ho Ministériu Finansa, faze tuirmai sei avansa ba prosesu aprovizionamentu hodi loke konkursu.
“Ida-ne’e investimentu privadu ne’ebé ita la uza ona osan husi Orsamentu Jerál Estadu (OJE) para prodús xapa matríkula. Di’akliu ita loke outsourcing ba kompañia privada sira para halo konkursu. Ne’e hanesan hanoin ida para investe, tanba ita uza osan Estadu mós ita la rezolve problema,” Manetelu esplika.
Ministru Miguel akresenta, tanba orsamentu Estadu ne’e aloka iha tinan-tinan, dalaruma iha tinan klaran xapa ne’e hotu tiha ona, entaun tenke uza suratahan provizoriamente, ne’e duni mak agora buka atu rezolve.
“Setór privadu sira tenke prepara-aan. Sé mak aban-bainrua manán konkursu nia tenke instala mákina prodús xapa iha Timor. Nia vantajen ida katak osan ne’e la sai ona bá rai-li’ur,” nia subliña.
Jornalista: Alexandra da Costa
Editór: Xisto Freitas da Piedade
