Agrikultór Buanurak husu Governu tau morru protesaun ba natar
VIKEKE, 11 Agostu 2025 (TATOLI)—Reprezentante agrikultór Buanurak, Suku Uabubu, Postu Administrativu Ossú, Munisípiu Vikeke, Manuel Afonso da Costa Guterres husu Governu liuhusi Ministériu Agrikultura, Peska, Pekuária no Floresta (MAPPF) konstrui morru protesaun ba natar Buanurak ne’ebé ameasadu husi mota.
“Agora daudaun ne’e ami-nia natar ektare haat inklui uma komunidade ida ne’ebé hetan ameasa husi mota Logobere. Tan ne’e, ami husu ba MAPPF hodi kria morru protesaun nune’e bele satan mota hodi labele estraga natar no uma komunidade nian tanba besik tiha ona mota,” Manuel Afonso da Costa Guterres ba jornalista sira iha natar Buanurak, Postu Administrativu Ossú, Segunda ne’e.
Manuel afirma bainhira la halo morru protesaun ruma, tempu udan mota tun sei afeta ba natar tanba distánsia husi mota ba natar besik tiha ona, la to’o metru ida mota bele estraga natar.
Nia haktuir katak daudaun ne’e Programa Dezenvolvimentu Integradu Munisipál (PDIM) Vikeke implementa hela obra gabiaun, maibé to’o de’it metru 45, presiza konstrui to’o metru 200.
Hatán ba kestaun ne’e, Diretór Jerál Kafé Planta no Indústria husi MAPPF, Martinho Laurentino Soares informa katak kona-ba mota Logobere ne’ebé daudaun ne’e ameasa agrikultór sira-nia natar presiza halo pedidu ba MAPPF hodi tau-atensaun.
“Kona-ba preokupasaun ne’e ita-nia agrikultór sira halo pedidu ruma haruka ba nasionál hodi hodi prioriza nune’e aban-bainrua bele konstrui morru protesun hodi asegura natar,” nia tenik.
Iha biban ne’e, Diretór SMAPPF Vikeke, Olívio Soares Freitas subliña katak natar Buanurak ne’ebé dauduan ne’e mota ameasa SMAPPF Vikeke sei tau ba importánsia, tan ne’e entrega ona pedidu ba nasionál hodi iha konsiderasaun.
“Loos duni mota Logobere agora fó ameasa ba ita-nia agrikultór sira-nia natar iha área Buanurak. Ohin, ita hamutuk ho agrikultór sira entrega ona pedidu ba nasionál para sira tau iha prioridade,” Olívio haktuir.
Jornalista: Vitorino Lopez da Costa
Editór: Xisto Freitas da Piedade
