CONECTIL distribui Manuál Edukasaun Morál Relijiaun Katólika ba eskola iha Bobonaru
BOBONARU, 11 Agostu 2025 (TATOLI)—Komisaun Nasionál Edukasaun Katólika Timor-leste (CONECTIL-sigla portugeza), Segunda ne’e, hala’o vizita ba Diresaun Servisu Munisipál Edukasaun Autoridade Munisípiu Bobonaru hodi fó koñesimentu no husu autorizasaun atu distribui Manuál Disipilina Edukasaun Morál no Relijiaun Katólika ba kada eskola hodi hanorin estudante terseiru síklu,ensinu sekundariu jerál públiku no tékniku vokasionál.
Prezidente CONECTIL, Pé. António Quencer hateten intensaun distribui Manuál Relijiaun Morál Katólika ne’e inklui referénsia seluk hanesan Bíblia Sagrada husi Katesizmu Ingreja Katólika no mós Hananu Ba Nai oinsá atu suporta manorin sira hodi hanorin estudante sira.
“Manuál hirak-ne’e ba terseiru síklu no ensinu sekundáriu jerál no tékniku vokasionál tanba atu responde ba ezame lokál nivel nasionál ne’ebé mak dezde 2018 ba 2019 hahú ona ezame lokál. Ami CONCECTIL mak prepara manuál, kurríkulu depoiz prepara nia matrix no pontu até ezame no korresaun,” nia hateten iha salaun enkontru Edukasaun Bobonaru, Segunda ne’e.
Prezidente CENECTIL afirma livru hirak-ne’e sei entrega ba eskola rai iha biblioteka nune’e karik iha polítika Governu halo mudansa ba profesór ruma, ida seluk mai troka nia bele uza filafali.
Padre hatutan manuál ne’e utiliza hanorin estudante ensinu baziku sétimu ho nonu anu. Ensinu sekundáriu nian mak désimu ho désimu-segundu anu, enkuantu ba oitavu anu ho désimu-primeiru anu sei lansa iha fulan oin hafoin CONECTIL halo distribuisaun ba eskola sira iha territóriu laran tomak nune’e tinan oin bele utiliza.
Amu lulik ne’e esklarese papél Disiplina Edukasaun Morál no Relijiaun Katólika ne’e oinsá tulun manorin sira atu fó formasaun karater, morál no kuda valór identidade kulturál relijioza sira-ne’ebé iha ba foinsa’e sira.
“Ami preokupa ho ekola públika tanba eskola públika nia númeru ne’e boot liu fali eskola katólika. Entaun, iha eskola katólika sira mak prodús ita-nia foinsa’e barak ne’ebé tinan-tinan ramata kontinua bá universidade iha rai-laran no li’ur, maibé buat ne’ebé ami preokupa mak formasaun, relijiaun, morál, étika no karater. Buat hirak-ne’e mak ba ami sai preokupasaun,” nia esklarese.
Iha biban ne’e, Diretór Servisu Munisipál Edukasaun Autoridade Munisípiu Bobonaru, Miguel Freitas agradese no konsidera distribuisaun manuál ne’e bele fasilita manorin sira hanorin estudante tanba durante ne’e eskola barak enfrenta problema menus livru.
“Ami presiza duni livru. Ida-ne’e mak esperansa boot manorin sira-nian tanba profesór sira-ne’e iha livru manuál ida de’it, enkuantu sira muda ba fatin seluk, livru ne’e sira tenke lori tutuir tanba livru ida de’it,” nia deklara.
Entretantu, totál eskola iha Munisípiu Bobonaru hamutuk 236 kompostu husi Ensinu Pre-Eskolár 59, Ensinu Báziku 144, Ensinu Sekundáriu Jerál 12, Ensinu Tékniku Vokasionál (6) no Ensinu Rekorrente 15. Totál estudante 306.044 kompostu husi feto 18.221 no mane 17.923.
Jornalista: Sergio da Cruz
Editór: Xisto Freitas da Piedade
