DILI, 11 Agostu 2025 (TATOLI)—Ministériu Saúde liuhusi Diresaun Nasionál Farmásia Produtu Médiku (DNFPM), sei haruka tan ai-moruk item lima ba laboratóriu Therapiutics Goods Adminsitartion Australia hodi teste kualiadade iha fulan-Setembru ne’e.
Notísia Relevante: DNFPM haruka ai-moruk item 12 ba laboratóriu Austrália
“Fulan oin, ita sei haruka tan item lima ba Australia hodi teste ai-moruk nia kualidade,” Diretór Nasionál Farmásia Produtu Médiku (DNFPM), Delfim Ferreira, hateten ba jornalista sira, iha JL Villa, ohin.
Nia dehan, item lima ne’e foti husi klinika privada sira no mós Institutu Nasionál Farmásia Produtu Médiku (DNFPM).
“Item sira-ne’e, fulan oin, ita haruka ba tan Austáalia mak hanesan Cloxacilin, Predniosolone, Nifedipin, Co-trimoxazole no Ciprofloxacin,” nia esplika.
Antes ne’e, iha tinan kotuk, Ministériu Saúde mós haruka item neen (6) ba Laboratoriu Australia hodi teste kualidade.
Husi rezultadu teste ne’e, ai-moruk item tolu (3) laiha kualidade hanesan Doxycycline Capsules BP 100 mg, Lepril-5 Enalapril Maleate Tablets IP no FLADEX Metronidazole infusion 100 ml.
Item ne’ebé teste kualidade mak hanesan Naf Nystatin Suspension BP 100,000 units/ml, Paracetamol Sirup 120 mg/5 ml no Paracetamol Kaplet 500 mg.
Jornalista : Felicidade Ximenes
Editór : Cancio Ximenes
