Lere husu Kombatente kontinua konsolida forsa hametin organizasaun
BAUKAU, 11 Agostu 2025 (TATOLI)—Tenente Jenerál FALINTIL-Forsa Defeza Timor-Leste (F-FDTL), Lere Anan Timur husu veteranu no kombatente sira atu kontinua konsolida forsa hodi hametin organizasaun Kombatente Libertasaun Nasionál.
Lere konsidera veteranu nu’udár patrimóniu nasaun, mezmu la’ós timoroan hotu gosta veteranu ninia ezistténsia maibé Lere fiar lutadór sira-ne’ebé mak mate ba ukun rasik aan no rai-lulik sei nafatin tau-matan ba kombatente sira hodi kumpri misaun liberta povu husi ki’ak no mukit.
“Ita defende objetivu ida de’it, halo oinsá ita konsolida nafatin ita-nia organizasaun. Timor la’ós ema seluk ema leet mak ukun. Ita mak ukun. La’ós ita hotu-hotu tuur iha-ne’ebá, más ita-nia reprezentante mak Prezidente Repúblika, Ramos Horta no Primeiru-Ministru, Xanana Gusmão,” Lere Anan Timur hateten iha Sentru Konvensaun Baukau, Vila Antiga, Baukau, Segunda ne’e.
Nia esplika katak tuir istória, loloos FRETILIN mak na’in ba ukun aan no FALINTIL mak riin ba nasaun, maibé ho ezisténsia Kombatente Libertasaun Nasionál iha faze ukun-aan, entaun Kombatente Libertasaun Nasionál mak reprezenta na’in ba ukun-aan no riin ba nasaun.
Jenerál ne’e kontinua husu ba líder nasionál sira hanesan Marí Alkatiri, Francisco Guterres ‘Lú Olo, Taur Matan Ruak, Xanana Gusmão no Ramos Horta atu fó-liman ba malu nune’e hamutuk hadi’a povu nia moris.
Entretantu, Prezensa Lere Anan Timur iha Baukau hodi partisipa iha konferénsia ba daruak Konsellu Munisipál Kombatente Libertasaun Nasionál iha Baukau ne’ebé realiza durante loron-rua, 11-12 Agostu iha Sentru Konvensaun Baukau.
Jornalista: Natalino Belo
Editór: Xisto Freitas da Piedade
